Duna nay bag-ong napili nga Sanguniang Kabataan Federation President sa Probinsiya sa Sugbu.
Atol sa gipahigayung eleksyon sa pederasyon kagahapon sa buntag diha sa Capitol Social Hall ang SK Federation President sa lungsod sa Samboan nga si Bea Mercede Calderon maoy napili sa maong posisyon nga walay kontra.
Gumikan sa iyang kadaugan siya maoy mohulip sa biyaang posisyon sa iyang ig-agaw nga si outgoing SK Federation President sa probinsya Ramon Martin Calderon.
Si Bea Mercede apo ni kanhi kongresista ug karun barangay kapitan sa Poblacion, Samboan nga si Emerito Calderon Sr.
Samtang napili isip bise presidente sa SK Federation sa probinsya mao si Richard delos Reyes sa Argao, pagka secretary si Madel Herrera sa lungsod sa Consolacion, Betty An Lawas sa siyudad sa Danao pagka treasurer, Ethel Marie Cabigas sa syudad sa Talisay pagka auditor, Alfredo Arquilliano III sa San Francisco Camotes pagka Press Relation Officer (PRO) ug pagka Sergeant at Arms mao ang SK President sa Bantayan Island nga si Ron Micheal Legaspi.
Gisugdan ang eleksiyon sa alas 10:00 sa buntag ug pagkahuman gisunod dayun ang pagpapanumpa sa mga bag-ong napili nga opisyal sa SK sa probinsya sa Sugbu.
Nunot niini gihulagway nga malinawon ang pagpahigayun sa maong pinili-ay sa SK nga walay mga nitumaw nga reklamo may labot sa pagsamok samok ug pag-impluwensiya sa pipila ka mga dagkung politiko.