Opisyal sa PNP namatay sa aksidente sa motorsiklo

Patay ang hepe sa Moalboal kinsa kanhi nadestino usab sa dakbayan sa Talisay niadtong Martes sa gabii human sa iyang operasyon sa ulo tungod sa grabeng kadaot dihang nasugamak kini og aksidente sa karsada sa Barangay Lawaan III, Talisay.

Ang biktima mao si Police Inspector Gil Limosnero, 46-anyos, taga lungsod sa Minglanilla kinsa nakaangkon og grabeng kadaot sa iyang ulo human nga ang iyang giangkasan nga motorsiklo mibuto ang ligid niini sa likod niadtong Disyembre 5.

Si PO3 Lemberto Empeynado, taga Barangay Lagtang, dakbayan sa Talisay kinsa nadestino usab sa Moalboal mibutyag sa Banat News kagahapon sa buntag nga siya ug si Limosnero mianha sa dakbayan sa Talisay.

Mga alas 9:00 sa gabii sa maong adlaw, si Limosnero nagpahigayon og meeting sa mga miyembro sa Front Site Gun Club kinsa siya usab ang presidente.

Matud ni Empeynado nga human sa maong meeting pasado alas 11:00 sa gabii mipaingon na silang mopauli diin mihapit sila diha sa iyang balay sa Lagtang dayon mideretso na sila paingon na unta sa Minglanilla tungod kay ihatud na niya ang iyang opisyal apan pag-abot nila diha sa lugar nga nahitaboan kalit lang mga mibuto ang luyo nga ligid sa iyang motorsiklo ug nag-zigzag ang ilang dagan dayon natumba sa karsada.

Si Empeynado nagkanayon nga wala siya kahibalo kung milayat ba sa motorsiklo ang iyang opisyal tungod kay nawagtangan siya sa panimuot human sa hitabo apan nagtuo siya nga nabunal kini sa aspalto nga karsada.

Sila si PO2 Henry Diano ug PO2 Ferdinand Pablo mga traffic police sa dakbayan sa Talisay ang miresponde sa insidente diin ang duha ka biktima dali nilang gidala diha sa Talisay district hospital.

Gibutyag ni Empeynado nga iyang gipangutana si Limosnero nganong dili kini magpa-confine apan mitubag kini nga “okay ra siya”.

Apan sa pagkasunod adlaw mireklamo si Limosnero nga gibati kini og kalipong ug sakit sa ulo hinungdan nga dali kining gidala sa South General Hospital sa dakbayan sa Naga ug nasuta sa resulta sa CT scan nga dunay blood clot ang ulo sa maong opisyal ug gisulod kini sa Intensive Care Unit (ICU).

Ang asawa ni Limosnero nga si  Elvisa mibutyag sa Banat News kagahapon sa buntag nga niadtong Lunes sa hapon niining semanaha ang iyang bana gikan sa ICU gibalhin na kini sa kwarto sa hospital  tungod kay ang doktor nagkanayon nga okay na ang iyang bana ug ang mibagtok nga dugo  sa ulo maayo lang sa padayong pagtambal.

Apan niadtong Martes ang iyang bana misuka  og dugo ug ang ubang dugo nanggawas sa ilong ug pag alas 9:30 sa buntag sa maong adlaw gipaubos sa operasyon si Limosnero.

Si  Elvisa midungag nga human sa operasyon kritikal ang kondisyon sa iyang bana kinsa nag-comatose kini ug gisulod na usab kini sa ICU.

Ug matud ni Mrs. Elvisa nga ipaubos pa unta sa pito ka adlaw nga obserbasyon ang iyang bana apan wala na kini maka-survive.