Patay’ng tiguwang ‘lutaw sa dagat

Naukay kagahapon sa kadlawon ang mga residente sa Sitio Galaxy, Barangay Tanke, dakbayan sa Talisay tungod sa usa ka patay’ng lawas sa tiguwang nga lalaki nga napalgan sa usa ka mananagat sa maong lugar.

Si Leo Cabalan,  konsehal sa maong barangay ang daling mitaho sa kapolisan sa Barangay Poblacion sa maong insidente.

Ang grupo sa homicide section ug roving team nga gipangulohan ni PO2 Rico Emperwa ang miresponde sa maong alarma.

Base sa imbestigasyon sa mga polis nga si Dionisio Badajos usa ka mananagat sa lugar ang nakakita sa nahisgutang patay’ng lawas sa dike dihang migawas siya sa ilang balay tungod sa sugo sa lawas.

Ang maong patay’ng lawas nagsul-ob og green nga t-shirt nga dunay marka nga SMC Medical Bowling Tournament , itom nga short pants ug puwa nga mga tsinelas.

Ang nahisgutang patay’ng lawas gidala diha sa Cebu Memorial Homes sa Barangay Linao.

Sa laing bahin, si PO2 Lino Diez, polis sa siyudad mibutyag sa Banat News kagahapon sa buntag nga ang maong patay’ng lawas sa buhi pa kini ang gidala diha sa ilang buhatan sa usa ka langyaw ug mga tanod sa Barangay Biasong niadtong Huwebes sa gabii.

Matud ni Diez nga ilang gibana-bana nga nagpanuigon sa 70-80 anyos ang maong tiguwang nga lalaki ug dihang ilaha kining gipangutana kung diin gikan ug nagpuyo igo lang kining mitubag nga dapit sa “Sambag ug Menchanitas” ug daplin sa dagat.

Ang kapolisan walay nakuhang mga identification o mga dokumento aron mailhan ang tiguwang.

Si Diez ug SPO4 Henry Obiso mihatud sa maong tiguwang ngadto sa Barangay San Roque.

Si Diez nagkanayon nga ang mga tanod sa maong barangay mipasalig ngadto kanila nga maoy mohatod sa maong tiguwang tungod kay nakadumdom sila sa gipasabot niining lugar apan napalgan na lang kining patay na.