Polis buot ipakihang Tomas

Ipakiha ni Mayor Tomas Osmeña ang pulis nga nag-sideline og negosyo pagpamaligya og karneng baboy diha sa barangay Pit-os nga si  SPO3 Jeffrey Archival, kinsa nasakmitan og 70 kilos nga karneng baboy sa public health staff human usab ireklamo.

Mga legal nga kakompetensya sa maong pulis diha  sa ilang barangay ang giingong nangreklamo tungod kay napuhalan sa baligya niini. 

Ang nasakmit nga karne giihaw diha ra sa panimalay ni SPO3 Archival ug gikonsederar ni City Veterinarian Doctor Alice Utlang nga hot meat.

Makonsidirar nga hot meat ang karne kung kini giihaw sa dili accredited nga ihawan ug walay mapakita nga meat inspection certificate ang tag-iya nga nagbaligya niini.

Una nang gipahibawo ni   Utlang nga gahi og ulo ang nahisgutang pulis tungod kay kini giingong makapila na nila pasidan-i.

Nasayran gikan kang Utlang nga makatulo na masakmiti og karne ang maong pulis tungod gihapon sa susamang kalapasan.

Unang higayon nga nasakmitan og  karneng baboy si SPO3 Archival niadtong tuig 2005 ug kini gipasaylo lang una sa kalapasan niini.

Apan nasubli kini niadtong niaging tuig ingon man sa sayong bahin niining semanaha hinungdan nga gitaho na ni Utlang ngadto kang Mayor Osmeña.

Matud ni Utlang nga gawas nga dili accredited ang giihawan sa baboy, walay napakita usab nga lisenya si SPO3 Archival isip meat vendor o meat shop owner.

Gawas sa kalapasan sa mga ordinansa sa dakbayan nga nalapas sa maong pulis, kini ipakiha usab sa mayor ngadto sa Ombudsman Visayas.