Singko anyos naligsan sa Talisay, patay

Usa ka 5 anyos nga batang lalaki ang  naligsan ug nalatayan sa usa ka KIA Picanto Hatchback nga awto pasado alas 12 sa udto nga may plakang YEW-763  sa may Cebu  Pacific Heights Subdivision, Barangay Candulawan siyudad sa Talisay.

Ang biktima giilang si Renan Dejito nga nagpuyo sa maong dapit. Ang gitumbok nga nakaligis sa biktima mao si Gina Fajardo Bacatio, 28 anyos, dalaga ug nagpuyo  sa nahisgutang dapit.

Base sa inisyal nga imbestigasyon nga gihimo sa mga ni-responding kapulisan pinangulohan ni PO1 Erwin Denila, samtang nagdagan ang sakyanan sa suspetsado kalit lang nilabang ang biktima ug aksidenting naligsan ug nalatayan kini.

Human sa maong insidente daling gidala sa Talisay District Hospital ang biktima apan gidiklarar kini nga dead on arrival sa mga doktor.

Ang suspetsado boluntaryong ni-surender sa mga kapulisan sa Talisay ug kasamtangan naghuwat aron pasakaan og kaso.