Mag-atubang karon og problema ang usa ka community cop diha sa barangay Pit-os nga nag-sideline og negosyo pagpamaligya og karneng baboy kini human masakmiti sa public health staff og 70 kilos nga karneng baboy si SPO3 Jeffrey Archival nga giihaw sulod sa iyang panimalay.
Ang nahisgutang pulis giingong makapila na ireklamo sa ilegal niining pagpangihaw og baboy ilabina sa iyang mga kakompetensiya.
Matod ni City Veterinarian Doctor Alice Utlang nga gahi og ulo ang maong pulis tungod kay makapila na usab kini nila pasidan-i sa iyang illegal nga negosyo.
“Katulo na siya naka-violate, 2005 nadakpan na namo siya, gihatagan na og stern warning, last year nadakpan sab wala pa gyud na siya mokuha og lisensya sa iyang pagka-meat dealer o meat shop owner, bisan og makapila na namo ingna pasabot sa City Veterinarian.
Miingon si Utlang nga dili na nila mapasaylo si SPO3 Archival ug iya na kining isumbong ngadto kang Mayor Tomas Osmeña.
Sa pikas bahin gipahibawo usab ni Utlang nga ilang gidoble karon ang kampanya batok sa mga karne nga gitawag og hot meat.
Makunsiderar nga hot meat ang karne kung kini giihaw sa dili accredited nga mga ihawan sa National Meat Inspection Service kon NMIS, ug walay meat inspection certificate.
Gani kagahapong adlawa, ang operation hot meat sa dakbayan sa Sugbu nakasakmit og duha ka "double dead" nga karneng baboy.
Ang maong mga karne giingong nagagikan sa Plaridel sa Misamis Occidental nga gisakay og barko paingon dinhi sa Sugbu.
Kini giingong itumod unta diha sa merkado sa Carbon apan nasigpatan sa operation hot meat.
Niingon si Utlang nga gilubong na ang nahisgutang mga karne samtang tukmang mga kaso ang ipasaka usab batok sa tag-iya niini.
“We’ll file a case against sa mga violators kay murag nigara na ni sila da, labing minos tulo ka kaso atong mapasaka ani nila,” nagkanayon ang City Veterinarian.