Petisyon vs. Japex dad-on sa SC

Mosang-at og petisyon sa Korte Suprema karung Biyernes ang pundok sa mga mananagat gikan sa lungsod sa Aloguinsan ug Pinamungajan  inabagan sa ubang sektor aron ipahunong ang nagpadayong  oil exploration sa Tañon Strait nga gipasiugdahan sa Japex.

Gipadayag ni Vince Cinches sa Central Visayas Fisherfolk Development Center Inc. kon FIDEC nipasabot nga direkta nilang ipasaka sa Korte Suprema ang maong petisyon human sila nakakuha og leksyon sa kaso nilang gipasaka kaniadto didto sa Regional Trial Court sa Bohol nga gibasura lamang.

Gawas pa gipasabot ni Cinches nga usa ka nasudnong proyekto ang nagpadayun nga oil exploration hinungdan nga direkta nilang iduso ang maong reklamo sa Korte Suprema.

Matud ni Cinches sentro sa mao nilang petisyon ang pagsang-at og reklamo sa mga hingtungdang opisyal sa gobyerno sa Department of Energy (DOE), DENR ug uban pa.

Ikaduha nilang demanda ang pagpahunong sa nagpadayong oil exploration human kini nakahatag og dakung kadaut sa kinaiyahan  ug naka-apektar og daku sa panginabuhian sa mga gagmay’ng mananagat sa maong lugar.

Matod ni Cinches usa ka solidarity lunch ang ilang himoon karung adlawa dungan ang pagpatawag og press conference aron plantsahon ang reklamo nga ilang ipasaka.

Gitug-an ni Cinches nga suportado ang   ilang petisyon gikan sa relihiyusong grupo, marine scientists, Integrated Bar of the Philippines (IBP-Cebu Chapter) ug Cebu Chamber of Commerce and Industry (CCCI).

Matud ni Cinches tinguha nila nga makakuha og injunction sa Korte Suprema aron kapugngan ang pagpadayon sa maong oil exploration.