4 mangunguot dakpan

Upat ka mga gidudahang mangunguot ang nadakpan niadtong milabay’ng gabii diha sa Barangay Zapatera, ning dakbayan atol sa ginukdanay human nila kuoti ang usa ka pasahero sa jeepney.

Ang upat pulos mga taga barangay Tambulilid dakbayan sa Ormoc nga giilang sila si Rodel Dasigan, 36, Fernando Sicsic, 36, Bartolome Basarte Jr., 38 ug si Joemar Mendoza, 22, samtang giila ang duha nga nangikyas mao sila si Chito Mendoza, 36 ug si Ricardo Montano, 40 nga taga Villaba, Leyte.

Ang pagpanguot nahitabo diha sa dalan D. Jakosalem sa nahisgutang barangay diin usa ka babayeng pasahero nga si Christine Bayon-on, 26, taga dalan Escario Barangay Kamputhaw ang nakuotan.

Sa imbestigasyon nga gihimo sa kapolisan ang mga suspetsado sakay usab sa pasaheroang 04C gikan sa Carbon ug pag-abot sa maong barangay nakamatikod ang biktima nga wala na ang iyang pitaka nga sulod sa shoulder bag dali kini siyang nangayo og tabang diha sa Zapatera Barangay Hall.