Protesta vs. oil price hike ilusad

Gibutyag ni Ruben Rama ang Secretary General sa Nagkahiusang Drayber sa Sugbu (NADSU)   nga gi-plantsa na nila ang tanan alang sa lihuk protesta karung Huwebes nga sugdan sa alas 9:00 sa buntag.

Matud ni Rama silang mga drayber ug operator nga sakop sa NADSU anha magtapok sa Mandaue ug magdungan og paingon sa Fuente Osmeña Oval aron magtagbo sa mga militanteng pundok ug urban poor nga mosalmot sa maong protesta.

Lakip sa gipaabot nga mosalmot sa maong protesta mao ang Bayan Muna, Anakbayan, Pamana Sugbu, Kadamay  ug mga urban poor.

Matud ni Rama gikan sa Fuente Osmeña magbaktas sila paingon sa buhatan sa Department of Energy (DOE-7) aron iduso ang position paper nga nanawagan sa gobiyerno nga ibasura ang Akta Republika 8479 kon Oil  Deregulation Law nga maoy gitumbok nilang hinungdan niining walay hunong nga pagsaka sa presyo sa lana.

Ang chairman sa Bayan Muna Central Visayas Jaime Paglinawan mihulagway nga subo ang Pasko nga saulogon karung tuiga tungod sa pagka inutil sa administrasyong Arroyo pagpakgang sa pagsige og saka sa presyo sa lana.

Samtang gibahad ni Rama nga molusad gyud sila og transport strike   tapos karung tuiga kun ugaling magmagahi sa pagpaminaw ang gobiyerno sa giduso nilang mga demanda.

Iyang gihulagway nga pait na kaayu ang kahimtang karun kanilang mga drayber tungod kay wala nay masobra sa ilang kita matag adlaw gumikan kay adto na kini mopaingon sa gasolinahan tungod sa kamahal na sa litro sa gasolina ug krudo.