Nangisda, gitadtad og bala

Usa ka 26 anyos nga lalaki ang napalgang naglutaw sa sapa sa Mananga ug wala nay kinabuhi.

Ang biktima giilang si Fernando Hervas Y. Ramos Jr. ulitawo ug nagpuyo sa sitio Central, barangay Biasong lungsod sa Talisay.

Base sa inisyal nga imbestigasyon nga gihimo ni PO2 Joel Rosales, pasado alas 4 sa hapon niadtong Disyembre 10, nananghid ang biktima sa iyang inahan nga si Rosario nga moadto sa sapa aron mangisda.

Human sa pipila ka mga oras ang milabay, ubay-ubay nga buto ang nadunggan sa mga tawo ug nagtuo nga bunga lamang kini sa pabuto.

Apan sa dihang giadto nila kini mao nalay ilang nakit-an nga naglutaw ang biktima sa sapa ug wala nay kinabuhi.

Ubay-ubay samad pinusilan sa   nagkadaiyang parte sa lawas ang naangkon sa biktimaw hinungdan sa hinanaling kamatayon niini.

Padayon pang giimbestigahan sa mga kapolisan sa Talisay ang motibo sa pagpatay sa biktima.