Notadong "pusher" na-buy-bust

Gibantog nga pusher  og shabu sa Marigondon, dakbayan sa Lapulapu ang nadakpan sa kapolisan kuyog sa usa ka babaye ug nasakmit ang 20 ka pakete nga gituohang shabu, mga cellphone ug mga kahimanan alang sa paggamit niini.

Si PO3 Joseph Damasco nga gikahinabi sa Banat News miila sa duha nga nadakpan nga mao sila si Domie Bonghanoy Oyao,45 nga taga barangay Agus sa maong dakbayan.

Ang ikaduhang nadakpan mao si Renalyn Duran Culfo, 18 nga lumad nga taga Pag-utlan, lumad nga taga sitio Pag-utlan, barangay Maslog, dakbayan Danao.

Matud pa ni P03 Damasco nga ang team sa vice squad section sa kapolisan sa dakbayan nga gipangulohan ni SP02 Honorato Tano maoy nakadakop sa duha ka mga suspetsado.

Nasakmit sa kapolisan atol sa pagkasikop sa mga suspetsado mao ang 15 ka plastic nga gisudlan og  "shabu", buy bust money ug mga  kahimanan sa paggamit niini.

Ang duha ka dinakpan nga gitanggong karon sa kapolisan ang gikatakdang pasakaan og kaso karong Lunes nga kalapasan sa Section 5 ug Section 11 sa Article II sa Republic Act 9165 kun Comprehensive Dangerous Drug Act of 2002.