Polis “namusil” gireklamo ngadto sa NAPOLCOM

Mag-atubang karon sa summary dismissal proceedings ang usa ka polis kinsa gireklamong namusil sa usa ka batan-ong miluwas sa iyang higala gikan sa gikaaway nga gidudahang mga sakop sa Alpha Kappa Rho niadtong milabay’ng bulan sa Agosto diha sa dalan J. Tabora dili layo sa Pardo Police Station diha sa Poblacion barangay Pardo.

Ang mag-atubang og summary dismissal proceedings giilang si PO1 Ronald Bahian nga sakop sa Pardo Police Station kinsa gireklamo og administratibang kaso nga grave misconduct, serious neglect of duty ug gross incompetence.

Usa ka batan-ong giilang si Ronald Angcon ang misang-at og reklamo batok sa maong polis human siya niini gikatahong gipusil sa likod samtang siya nag-agak sa iyang higala kinsa nakakita og away sa mga gidudahang sakop sa Alpha Kappa Rho fraternity.

Atol sa pre-charge investigation sa National Police Commission-7 napamatud-an sa maong buhatan nga dunay paigong rason aron isaka ang maong kaso.

“Based on the allegations of the complainant and evidence presented, the pre-charge evaluator concluded that respondent is liable for the said administrative offenses he committed against the complainant,” sumala pa sa gipadalang pamahayag sa Napolcom-7.

Ang pagpamusil gikatahong nahitabo niadtong Agosto 18 ala-una sa kaadlawon dihang si Angcon ug iyang higala padulong na pauli aron likayan ang gidudahang mga fratman.

Apan samtang sila naglakaw gikatahong kalit nga miabot si Bahian nga nakasibilyan lang niadtong tungura ug sila gidakop, apan gumikan sa kahadlok nga maapil sa kagubot sa iyang higala nga miresulta sa pagpamusil dali siyang midagan.

Ning tungura mipasangil si Angcon nga siya gipusil ni Bahian diha sa likod gikatahong wala gyud siya tabangi sa maong polis aron siya madala sa tambalanan.

Si Napolcom-7 director Atty. Bernardo Calibo uban sa mga abogado sa maong buhatan human nakadawat sa impormasyon  kabahin sa insidente miadto sa Cebu City Medical Center dala ang laptop nga maoy gibutangan sa E-gallery sa tanang mga polis sa Cebu City Police Office.

Giingong pinaagi sa pagpatan-aw kang Angcon sa mga hulagway sa mga polis diha niya mamay-ungi si Bahian. Niadtong milabay’ng semana, gipadad-an na og summon si Bahian aron patubagon sa maong pasangil.

Nasayran gikan kang SPO4 Edgar Baranggan sa Pardo Police Station sa pakighinabi sa Banat News nga si Bahian sakop sa miscellaneous team niadtong tungura ug miresponde usab sa maong alarma uban nila ni PO2 Miguel Enriquez ug PO2 Joel Lacson. Nabalik sila sa ilang buhatan alas 2:10 sa kaadlawon ug mi-report nga si Angcon gidala na sa mga estambay ngadto sa tambalanan.

Nasuta nga si Bahian gikatahong tua na sa Cebu Provincial Police Office nadestino.