Chinese candy buot ipa-ban sa hunta

Nunot niining nasinati nga nagsunodsunod nga food poisoning sa mga Chinese candy sa mga tinun-an sa kalungsoran dinhi sa Sugbu, ang hunta probinsyal mihimo karon og lakang aron kapangitaan og paagi nga dili na tugotang bastabasta na lang makabaligya ang mga tindahan sa mga candies nga ginama gikan sa nasud sa China.

Si Bokal Juan Bolo hugtanong miawhag sa Bureau of Food and Drugs (BFAD-7) nga mohimo og aksyon alang sa hingpit nga pag-ban sa mga Chinese candy nga padayong gipamaligya sa katindahanan dinhi sa Sugbu.

Si Bolo mihimo niining maong lakang human usa ka grade-2 nga bata didto sa dakbayan sa Naga  namatay niadtong Lunes diha sa Vicente Sotto Memorial Medical Center (VSMMC) tungod sa food poisoning.

Ang maong bata nga naila sa ngalan nga si Foinsythia Musa Nietes, tinun-an sa grade 2 sa Langtad Elementary School ug gikataho nga nakakaon og Chinese  candy nga maoy hinungdan sa  pagkahilo niini.

Gumikan niini, si Bolo mihingusog nga ikapatuman sa BFAD-7 ang pag-ban sa maong mga produkto gikan sa China aron paglikay nga duna pay ubang mga bata ang mabutang sa peligro.

Kini human una nang gika-report ang nasinati nga food poisoning sa mga tinun-an didto sa lungsod sa Madredijos isla sa Bantayan niadtong miaging bulan ug ingon man sa mga tinun-an sa lungsod sa Oslob human makakaon sa mga candy gikan sa China.