Lapulapu central school nasunog

Mokabat sa P500 mil ang danyos sa tulo ka edipisyo nga nasunog sa Lapulapu City Central School kagahapon sa kaadlawon.

Base sa imbestigasyon ni SFO1 Rodolfo Apa sa kabomberohan sa dakbayan sa Lapulapu nasuta nga overheat sa electric fan ang posibleng hinungdan sa pagkasunog sa classroom nga gidumala  sa magtutudlo nga si Lilibeth Cagadoc diin posibleng nalimtan kini sa pag-ibot sa cord ngadto sa outlet niini.

Gumikan kay hinimo sa kahoy ug katunga semento ang maong edipisyo hinungdan nga dali ra kaayo ang pagkatap sa kalayo nga mikaon sa uban pang classroom niini.

Hinuon atol sa sunog walay gikatahong nasamdan ug naangol sa maong insidente ug matud pa ni Antonio Tumulak nga  guwardiya sa maong tunghaan nga didto nagsugod ang kalayo sa lawak ni   Cagadoc ug sa ilang pagsuway og palong niini dili na matabang hinungdan nga mitawag sila sa kabomberohan.

Nadawat sa kabomberohan ang alarma mga 3:05 kagahapon sa kaadlawon ug gipaubos kini sa 3rd alarm ug nakontrolar kini sulod sa tulo ka minutos.

Samtang ang DepEd sa Lapulapu mipadayag nga mohimo sila og dinaliang lakang sa pagpabalik sa maong edipisyo alang sa mga tinun-an nga bisan pa sa maong hitabo padayon ang ilang klase sa mga bakanteng lawak o ilawom sa kakahuyan.

Matud pa ni Jasmin Amores, ang Division Supervisor sa DepEd Lapulapu nga ila pang gihulat ang report sa OIC principal ug district supervisor sa maong tunghaan nga si  Felisisima Berdin aron kini maoy basehanan sa ilang pagpangayo unya og hinabang ngadto ni Mayor Arturo Radaza ug sa Local School Board sa dakbayan sa Lapulapu.