Pagbuwag sa Banawa ipadali

Ipadali ni  Kongresista Antonio Cuenco sa konseho sa dakbayan sa Sugbu ang paghimong barangay sa Banawa-Ingles nga magbuwag sa barangay Guadalupe.

Kini maoy panawagan ni Cuenco human usab ubay-ubay na sa mga residente sa maong lugar ingon man opisyal sa barangay Guadalupe ang nagtinguha niini.

Si Cuenco nga nahinabi sa Banat News mipadayag nga ang maong isyu taud-taod na kini ug panahon pa sa iyang anak nga nahimong konsehal si Ronald Cuenco kinsa maoy miduso kaniadto apan wala mapadayon ang maong katuyoan.

Ang kongresista mipasabot nga dili ikalimod nga ubay-ubay na sa mga lumolupyo sa maong lugar ang nagkisi-kisi nga mabuwag sa Guadalupe ang Banawa ug Ingles gumikan usab sa kadako sa ilang population.

Matud pa niini nga panahon na nga mabulag ang Banawa ug   Ingles sa Guadalupe sa dili pa mapupos ang ilang termino.

Alang kaniya kun mapanday lang og dali sa konseho ang gikinahanglang proseso alang sa usa ka ordinansa paghimog buwag nga barangay sa Guadalupe andam siya nga mosuporta niini.

Gani alang kaniya kun maglangaylangay ang konseho hayan siya maoy mangunay niini sa pagpalabang sa Ubos Balay Balaoranan  aron ipahigayon ang referendum  aron masukod ang pulso sa katawhan sa nahisgutang lugar.