Kandidato sa SK federation mi-walkout

Mi-walkout ang usa ka kandidato sa gipahigayong piniliay sa Sanguniang Kabataan Federation sa dakbayan sa Lapulapu human kini makamatikod nga dunay tinunto atol sa gihimong eskutinyo kagahapon sa hapon sa session hall sa city hall sa dakbayan sa Lapulapu.

Gikumpirmar ni Lapulapu City DILG officer  Elvira Rodriguez nga atol sa ilang pag-ihap sa mga balota si Sam Hamili Catajoy, SK chairman sa Barangay Pajac ug usa sa nagpapili pagka SK president mi-walkout kini sa maong session hall.

Base sa adviser ni Catajoy nga si Charles Baylosis nakita ni Catajoy atol sa pag-ihap sa mga balota nga sa matag botanteng SK chairman adunay gibutang sa ubos nga bahin sa ilang mga balota  nga ngalan sa barangay kun diin naggikan ang usa ka botante.

Gidudahan ni Baylosis nga kini aron sa pagsita kun kinsa ang wala mobotar sa manok ni  Mayor Arturo Radaza sa Lapulapu  nga si Reymar Dico nga SK chairman sa  Kalawisan nga mao usab ang midaog pagka SK Federation President sa Lapulapu.

Matud pa ni Baylosis nga nakadawat siya og impormasyon nga ang matag SK chairman gitanyagan og P20 mil  ni  Radaza aron suportahan si Dico pagka-federation president sa SK sa Lapulapu.

Apan   hugot kining gipanghimakak sa mga SK chairman nga nahinabi sa Banat News ilabi na sa kampo ni Radaza.

Si Rodriguez nga nahinabi sa Banat News mipanghimakak sa maong alegasyon ug mipadayag nga hapsay ang gihimong piniliay kagahapong adlawa ug walay kamatuoran nga dunay lugar nga gibutang sa mga botante sa ubos nga bahin sa maong mga balota.

Gumikan niini, si Baylosis ug Catajoy mopasaka kini og protesta ngadto sa DILG gumikan sa mga kalapasan nga ilang na-obserbahan atol sa maong piniliay.