SK president sa Talisay suportado ni Ediegul

Si Kongresista Eduardo Gullas ug Talisay City Administrator Richel Bacaltos mipadayag og suporta sa bag-ong napiling presidente sa Sangguniang Kabataan Federation sa dakbayan nga si April Marie Cabigas, SK chairman sa Barangay Cansojong.

Si Cabigas kinsa nagpanuigon og 17-anyos, usa ka first year college sa kursong Business Administration sa University of San Jose Recoletos ug apo ni  Konsehal Aaron Capala sa Talisay.

Si Cabigas mibutyag kagahapon sa Banat News nga nagpasalamat siya sa suporta ni Kongresista Gullas, Bacaltos ug sa iyang mga kauban kinsa mipili kaniya isip presidente sa federation.

Si Cabigas midungag nga ang development program alang sa mga batan-on maoy iyang tutokan karon.

Kagahapon, ang secret balloting sa SK Federation gipahigayon diha sa people’s hall sa city hall mga alas 8 sa buntag ug nahuman kini pasado na mga alas 11 sa buntag.

Si Cabigas nakakuha og 15 ka botos batok sa iyang kaatbang nga si Ayn Cabriana sa Barangay Lagtang kinsa nakakuha lang og pito ka botos.

Si Rizaleen dela Peña, SK chairman sa Barangay Tabunok, maoy napiling bise presidente,  secretary si Wendy Ybañez sa Tanke, treasurer John Ar Santos sa Biasong, Auditor si Natanya Nicole Bas sa Poblacion, PRO  si Janus Vince Bas sa Mohon ug Sgt. at Arms si Sacares Restituto sa Barangay Manipis.

Si Christian Plantar sa Lawaan II maoy napiling tsirman sa board of election ug sila si Michelle Ariog sa Lawaan I ug Cashmer Ararao sa Bulacao ang napiling mga miyembro.

Si Lindon General sa Barangay Maghaway ang napiling presiding officer kagahapon ug si Antonio Gonzaga II sa Tapul ang napiling temporaryong kalihim.

Si Talisay city Comelec officer, Corazon Moran, Walderedo Acay, hepe sa Department of Interior and Local Government (DILG) sa dakbayan ug Emigdio Enjambre, Kalihim sa Sangguniang Panlungsod sa siyudad maoy mga Board of Election Committee kagahapon.