Rama pagka-Kongresista – Cuenco

Nanghinaot si Kongresista Antonio Cuenco sa Cebu City South District nga si Bise Mayor  Michael Rama modawat na sa iyang tanyag  sa pagka-kongresista inig kahuman sa iyang   termino karong 2010.

Ang kongresista hugtanong nipadayag niini atol sa pag-pakighinabi sa Banat News kini tungod kay si Bise  Mayor Rama maoy  labing kwalipikadong kandidato sa Bando Osmeña Pundok Kauswagan (BOPK) sa ingon dili gyud mailog ang ilang liderato sa maong  distrito.

Matud pa ni Cuenco nga dili siya buot nga mailog lang sa kasayon ang ilang distrito ngadto sa taga oposisyon hinungdan nga si Rama maoy iyang gituboy gumikan kay absolute ang kwalipikasyon niini tungod kay dili sila makatugot nga huyang ang ibutang nga kandidato.

Dako kaayo niyang kalipay kun si Rama modawat na ning iyang tanyag diin dugay na niyang gihangyo sa wala pa magsugod ang piniliay sa mid-term election niadtong Mayo ning tuiga.

Subay niini iyang gipanghimakak ang taho nga sila si First lady Margot Osmeña maoy mag-tandem sa pagka-mayor ug bise mayor sa 2010.

Giklaro niini nga ang maong reports speculation lang ug walay kamatuoran kini tungod kay final na ang iyang desisyon nga mopasakop sa foreign committee sa gobiyerno human sa iyang termino.

Matud pa niini nga gusto na siya ngadto na usab moserbisyo sa foreign affairs sa nasud human sa pipila na katuig nga naglingkod isip usa ka kongresista.