Pangandam sa PNP sa kapaskuhan

Mopatawag og briefing si Police Regional Office-7 Chief Supt. Ronald Roderos ugmang adlawa sa tanang City ug Provincial Directors sa tibuok Central Visayas alang sa hugot nga pagpangandam sa kapolisan ning nagsingabot nga Pasko.

Si Roderos mibutyag atol sa Talakayan sa Isyung Polis (TSIP) kagahapong adlawa diha sa Club Ultima nga ilang hisgutan ang mga pamaagi ug lakang nga pagahimuon niining nagsingabot sa pagsaulog sa Pasko.

Usa sa pabutangan ni Roderos og daghang mga polis ang mga simbahan, mall, North ug South Bus terminal, pier area ug mga tourist spots sa tibuok Rehiyon Siyete sanglit kasagaran sa mga tawo ang mamauli sa ilang tagsa-tagsa ka probinsya ug pahimuslan ang taas-taas nga bakasyon hangtud na sa bulan sa Enero sunod tuig.

Napanglantawan usab sa mga opisyal sa PRO-7 nga mosaka na usab ang mga kaso sa pagpanguot, labni, tulis, kawat ug lungkab tungod kay kasagaran sa mga tawo anaa lang sa mga mall aron mag shopping ug biyaan nalang ang ilang mga balay.

Nunot niini giawhag sa mga opisyal sa PRO-7 ang katawhan nga dili gyud maghurot og panglakaw ug kinahanglan dunay ibilin sa ilang balay kay posibleng mosiaw na usab ang akyat bahay gang aron pahimuslan ang  higayon.

Karung sunod semana magsugod na ang misa de Gallo ug nipahimangno usab ang kapolisan niini nga dili maghurot og adto sa simbahan.