57 anyos gisungag sa motor

Patay ang usa ka 57 anyos nga babaye human kini madasmagi sa naghaguros nga motorsiklo sa dalan national sa barangay Dakit, lungsod sa Barili niadtong miaging buntag.

Ang namatay giila ni SPO1 Zaldy Orelio nga mao si Luzviminda Orelio, minyo, nga taga sitio Calubihan, barangay Paril sa maong lungsod.

Giila usab niya ang nakadasmag nga mao si Carlito Gutang, 27,  nga lumad nga taga Yati, Liloan, Cebu.

Matud pa ni SPO1 Orelio nga naglakaw ang biktima sa maong dapit ug kalit lang milabang sa pikas bahin sa karsada ug nabanggaan.

Dugang pa niya nga nakabaton og grabeng kadaut sa iyang ulo ang biktima sa pagkapantok sa ulo sa aspaltadong karsada.

Dali unta kining gidala sa Barili District Hospital apan ang mga doktor kinsa maoy nagtinabangay sa pag-atiman ang mideklarar nga nakabsan kini sa iyang gininhawa.