Nagubot sa CCPO kagahapon

Nagkagubot og makadiyot ang pagpresentar sa Cebu City Police Office sa suspek sa drive-by-shootings nga si Aristotle Aves alyas Ares human ang igsuon niining babaye nakigtinubagay sa mga kabanay sa mga biktima.

Ang manghod ni Aves nga si Buena Jay Aves, 26, kinsa diha ra sa panon dihang gipresentar si Aves ug Jesus Singson,Jr. misinta sa mga alegasyong gipatong diha sa iyang maguwang.

Ang manghod ni Aves misinghag sa pag-ingon kun nganong gihan-ukan tanan iyang maguwang sa pasangil ug mipasangil nga pulos tumo-tumo ra kini.

Siya nangangkon nga sukad pa niadtong Disyembre 22 sa tuig 2003 uwahi niyang nakita ang maguwang nga si Ares atol sa pagsaulog niini sa iyang birthday, ug tungod sa mga pasangil wala na mopakita bisan kanila ang iyang maguwang.

Apan ang iyang pag-insister nakapasakit sa mga inahan ug asawa sa mga biktima nga sila si Consuelo Aznar, Lermie Vasquez, Bobby Morados ug Liza Presbitero.

Si Aznar maoy inahan ni John William Aznar,23, samtang si Vasquez maoy inahan ni Lord Stephern Vasquez. Si John William ug Lord Stephen nagkuyog niadtong tungura sa Ascencion Street sa Sambag Uno dihang gipamusil ug nangamatay, naangol usab ang ilang higalang si Rey Pelleren niadtong Oktubre 4 sa gabii.

Samtang si Morados maoy amahan ni Engr. Lawrence Morados nga gipusil sayo pa nianang gabhiuna diha sa dalan V.Gullas. Si Presbitero usab ang asawa ni Eugene Presbitero nga gipusil-patay uban sa mga silingan diha sa dalan D. Jakosalem niadtong Septiyembre 21 sa gabii.

Ang inahang Aznar naghilak nga mipagawas sa iyang kasuko ug nangutanang mag-unsa nalang siya wala na ang iyang bana ug karon ang bugtong niyang anak nga si John William gipatay sab.

Mismo ang inahan ni Aves masuk-anong mipadayag sa linaing interbyu sa mga tigbalita nga dili siya makatuong gihimo kining tanang krimen sa iyang anak.

“Di tawon ingon ana ka hayop ang utok sa akong anak oy, nga magpataka nalang silag pasangil. Itarong sa na nila, ngano man? Bisan ipa-background-check pa ang among pamilya, dili sad mi ingon ana oy, kriminal nalang gyud mi?” asoy pa ni Josie,50, inahan ni Aves.

Matud pa niini ang init nga panagribal sa Akrho ug Tau Gamma Phi ug ang pagbansag sa iyang anak nga “notadong hitman” maoy nakapasamot sa problema.

Mipasangil usab kining mismong ang cartographic sketch nga gipagawas sa kapolisan sa drive-by-shootings dili  si Ares ug gibasehan lang nga hulagway mao ang picture niini nga niadto pang 1990.

Sumala pa niya, wala na mopakita ang iyang anak sukad nga gipasanginlan kining maoy namusil kaniadto diha sa dalan B.Aranas nga bisan kauban si Ares niadtong tungura nangatulog uban sa iyang amahan sa ilang balay.

“Walay inahan nga motambag sa iyang anak nga mao nay buhata nga ngil-ad. Kanang tanan hinuon dili sad siguro iyaha nang tanan,” asoy pang Josei Aves.

Ang komosyon tali sa mga kabanay sa mga biktima ug sa igsuon ni Aves miabot sa punto nga nagtinulisokay ang usag-usa ug nagsininggitay hinungdan nga gimando ni Sr. Supt. Patrocinio Comendador nga pagawson si Buena Jay.

Samtang gisubay usab ang report nga nalambigit na usab si Aves sa pagpanulis ug  gun-for-hire. Apan si Aves kusganong mihimakak sa tanang mga pasangil.

“Tua ko sa Samar ana sir, nakadawat ko sa tawag sa akong igsuon sa ingon ana nga hitabo ba. Ang ako sang sa akong kaugalingon basin pud matanggong (priso) ko ba,” asoy pang Aves sa mga tigbalita.

Samtang miangkon usab kini nga migamit siya og ID nga Mikael Colminas ang iyang pangalan. Gisusi usab sa kapolisan ang pagkatawo ni Jesus Singson,Jr. kung siya ba usab si Brandon Ramirez nga gidudahang kauban ni Aves sa iyang mga krimen.