Banawa – Ingles ibuwag sa Guadalupe

Padayon ang tinguha sa mga opisyal sa barangay Guadalupe, alang na sa paghulma og laing buwag nga barangay nga maglangkob sa Banawa-Ingles gumikan usab sa taas-taas nang panahon nga nagkadako na ang ilang populasyon.

Si Kapitan Eugenio “Jingjing” Faelnar nga nahinabi sa Banat News, mitug-an nga iyang gipadayon sa paglihok ang maong lakang kini human usab sa hangyo sa ilang ubang mga opisyal tungod usab sa ilang situwasyon  nga maoy pinakadaghan og botante ingon man area sa dakbayan sa Sugbu.

Ang kapitan mipasabot nga iyang gipaningkamutan nga matigayon gyud ang paghimog laing barangay sa dili pa mahuman ang iyang termino diin taud-taud na usab nga gipanawagan sa ubang mga katawhan sa ilang barangay.

Gipasabot hinoon niya sa iyang mga kaubanang opisyal nga dili nila dali-dalion sa pagproseso ang   Banawa area ug gikinahanglan kini’g igong pagtoon.

Paningkamutan nila nga mahan-ay ang  proseso sa Banawa area kini tungod kay base sa iyang nahibaluan nga mosobra sa 60%   ang tax declaration niini tua sa Barangay Labangon.

Nunot niini magkinahanglan kinig insaktong pagtoon sa ingon ang bag-ong barangay nga pagahulmahon nga mag-composed sa Banawa-Ingles area adunay iksaktong real property tax sa mga establisamento ug dili mapunta sa laing barangay.

Gitug-an usab niini nga nagpadayon karon sila sa pagsusi sa mga area nga maglangkob unya sa bag-ong  barangay hinungdan nga paubot-paabuton lang unya sa publiko ang public hearing niini.

Giangkon usab niini nga dili gyud masayon-sayon gilayon nga basta lang mohimo’g laing barangay ug nagkinahanglan kinig pagtoon sa mga nahingtungdang local government sa dakbayan labi na sa konseho nga mopalabang og balaudnon alang niini.

Dunay pipila nila ka mga opisyal nga nipadayag nga dili problema ang gidak-on sa ilang lugar ug kun maatiman lang sa husto ang maong lugar mamahimong dili na kini mopadayon sa pagbuwag sa Guadalupe.