Wala mahimuot si Cebu City Police Office director Sr. Supt. Patrocinio Comendador sa gipasiatab nga estorya sa kabanay sa nadasmagan sa Innova patrol car niadtong milabay’ng semana kabahin sa pagpasaka nila og kaso batok sa kapolisan.
Si Comendador sa pakighinabi sa mga tigbalita nagkanayon nga ang ‘side comment’ sa kabanay sa magtiayong Franz Josep Villalonga ug asawa niining si Vanessa mibahad nga ilang kasuhan ang drayber sa Innova patrol car nga si PO1 Norman Patindol.
Sa usa ka report sa usa ka pamantalaan, ang inahan ni Franz nga si Florentina nagkanayon nga wala sila mag-apas sa refund sa nagastos nila sa tambalanan pagpa-ospital kang Vanessa ug sa naguba nga sakyanan kundili aron tudloan og leksyon ang kapolisan.
Ang maong komentaryo giisip ni Comendador nga dili makiangayong komento tungod kay susama ra og daw sad-an na gyud ang kapolisan sa maong aksidente ug subling mipahinumdom nga ang mga polis maoy gidasmagan sa Volkswagen niadtong Nobiyembre 25 diha sa Fuente Osmeña Rotunda.
“Ok ra nga ilang I-file ang kaso, pero di lang unta ingnon nga ‘to teach the police a lesson’ nga mura man ba nga kanang tudloanan ta og lesson nga niresponde na nga tawo, ilang huna-hunaon nga ang polis is also endangering their lives kung armado tong gigukod ug nagpinusilay. They should look at the case sa taas-taas nga level ba dili lang sa personal nga level, ato lang iapelar sa ila nga dili lang mopagawas og mga side comments ba nga mura’g ilang ipagawas nga sad-an gyud ang polis,” asoy pang Comendador.
Hinuon si Comendador nagkanayon nga katungod sa kabanay sa naangol ang pagsang-at og kiha sa polis.
Matud pa niini nga ang mga bombero, patrolcars ug ambulansya dunay exemption sa traffic laws panahon nga dunay emerhensiya, ug ang tanang motorista angayan lang nga mag-amping kung makadungog sa siren ug makakita og nagsiga nga blinkers.