Notadong tulisan nasikop sa TRS

Nasikop sa mga sakop sa Theft and Robbery Section ang usa ka gipasanginlang notadong tulisan ug manglabnihay nga diha mag-operate sa Metro Cebu ilabi na sa barangay Carreta ug sa mga pier ning dakbayan.

Ang nadakpan giilang si Glenn Matondo, mas nailang “Bulldog,” 22, residente sa M.J. Cuenco sa barangay Carreta human siya masigpati sa mga residenteng nakaila kaniya ug gisumbong ngadto sa kapolisan.

Si Matondo gipangita na sa TRS tungod sa report nga bag-uhay lang kining nanulis niadtong Nobiyembre 30 sa usa ka babaye diha sa eskina sa M.J.Cuenco ug dalan Gen. Maxilom Ave.diin usa ka bracelet ug cellphone ang iyang nakuha.

Dihang naabtan si Matondo diha sa sitio Ponce sa barangay Carreta nakuha diha sa iyang lawas ang usa ka walo ka pulgadas nga bolt nga gilimbasan aron mahimong icepick ug usa ka paketeng may sulod nga gidudahang shabu.

Sumala pang Sr.Insp. Michael Bastes, hepe  sa TRS sa pakighinabi sa Banat News nga lima ka higayon  nang nabilanggo sa Bagong Buhay Rehabilitation Center si Matondo nga giangkon usab sa naulahi tungod sa mga kasong pagpanglabni ug pagpanulis.

Ang grupo nila ni SPO4 Isagani Pugoy, kinsa maoy nakadakop kaniya gitug-anan ni Matondo diin niya gibaligya ang iyang tinulis sa maong babaye nga mao ang cellphone ug ang silver bracelet diha sa usa ka residente ra usab sa ilang barangay.

Niadtong milabay'ng Nobiyembre 23, si Matondo kun alyas Bulldog maoy gitumbok nga mipusil sa iyang silingan nga si Anthony Tajanlangit, 23, human kini badlunga sa biktima tungod sa pagpangunay niini og kawat sa ilang mga silingan.

Si Matondo mihimakak nga gipusil niya ang biktima  kundili igo ra siyang mibawos ug mipasangil nga gigukod siya sa biktima ug mga barkada niini og kutsilyo kaniadto.