Nakigbulag giluba sa kapuyo

Lalaki gidunggab sa iyang live-in partner gumikan kay buot kini niyang bulagan didto sa  Tamiyaw, lungsod sa Compostela sa milabay'ng gabii.

Ang biktima mao si Lito Bitungcal,   ulitawo ug residente sa maong dapit.

Base sa imbestigasyon ni SPO4 Socrates Medillo ug PO1 Erwin Balverde sa Compostela Police Station nasayran nga mga alas 8  sa milabay'ng gabii nagkalalis si Bitungcal ug ang iyang  kapuyo nga si Genara Gestopa Romarez, 39, dalaga ug residente usab sa maong dapit gumikan kay buot na kining biyaan ni Bitungcal.

Gawas nga biyaan kini sa maong lalaki dad-on pa gyud ang mga kabtangan nga ilang napundar hinungdan nga mikuha og kutsilyo si Romarez dayong dunggab ngadto kang Bitungcal.

Ang biktima nga samaran sa iyang kamot ug ubang parte sa lawas gidala sa Chong Hua Hospital ug anaa na kini sa luwas nga kahimtang.

Samtang si Romarez dali nga mitahan sa iyang kaugalingon ngadto sa kapolisan sa lungsod sa Compostela.

Matud pa ni Romarez nga wala siya magbasol sa iyang gihimo gumikan kay aduna usab siyay katungod sa mga butang nga ilang napundar ug andam kini nga moatubang sa iyang kapuyo ngadto sa hukmanan.