PDEA naningil sa hinabang ni Liu
Naningil na ang Philippine Drug Enforcement Agency (PDEA-7) sa Cebu City Hall sa gisaad niining financial assistance alang sa testigo sa gobiyerno batok sa magsuong negosyante nga sila si Peter ug Wellington Lim.
Si Atty. Paul Clarence Oaminal, abogado sa PDEA-7 mitug-an sa Banat News nga hangtod karon wala pa gyud mahatagi og hibang si Bernard Liu gikan sa
Matud pa ni Oaminal nga bisan komunikasyon gikan sa kagamhanan sa dakbayan, wala gyud silay nadawat sukad nakagawas gikan sa Bagong Buhay Rehabilitation Center (BBRC) si Liu sa dihang gidawat sa kagamhanan ang iyang aplikasyon pagka-state witness batok sa magsuong Lim.
Si Liu maoy kanhi kawani sa mga Lim nga miangkong nasayod sa kalihukan sa negosyo sa ginadiling drugas sa magsuon.
Sumala pa hinuon ni Oaminal nga hangtod karon nagpaabot sila unsa nga klaseng tabang ang ihatag sa City Hall ngadto ni Liu.
Nasayran hinuon sa abogado sa PDEA nga hatagan og trabaho sa kagamhanan sa dakbayan si Liu imbes hatagan kini og hinabang pinansiyal.
Kompiyansa hinuon ang PDEA, sumala pa ni Oaminal, nga tumanon sa kagamhanan ang saad niining pagtabang kang Liu aron lang mobarug sa kanhi niini mga amo nga gialegar nga nalambigit sa pagpayuhot sa ginadiling drugas.
Subay niini, giklaro sa abogado sa ahensiya sa kagamhanan nga aktibo sa kampanya sa ginadiling drugas, nga kuntento si Liu sa nahimutangan niining safehouse nga gitagana sa PDEA kaniya samtang magpadayon ang pagtestigo niini.
Si Liu nauli-ulian na usab sa iyang lawas human kini makagawas gikan sa bilanggoan, matud ni Oaminal.
Midugang si Oaminal nga gisugdan na usab niya og hikay ang petisyon nga isumiter ngadto sa Department of Justice aron maka-apil si Liu sa witness protection program sa kagamhanan.
Una nang mi-aplay si Liu sa witness protection program sa kagamhanan, apan wala kini ma-aprobahi tungod sa kakulang sa papeles.
Si Oaminal nangayo usab og pag-abag sa Committee on Dangerous Drugs sa Ubos Balay Balaoranan aron mapadali ang pagproseso sa aplikasyon ni Liu nga mapaubos sa maong programa.
Giklaro sa abogado nga ang PDEA nagtuo nga aduna pay daghang impormasyon si Liu kalabot sa operasyon sa ilegal nga drugas sa magsuong Lim nga wala pa ikabutyag sa dihang mitestigos kini sa congressional inquiry niadtong nakalabay nang katuigan, nga angayang itug-an niini.
Nagpaabot hinuon ang PDEA sa hustong higayon pagbutyag niini.
- Latest
- Trending
