Opao police chief nasuspenso sa pagduaw ni Roderos

Gisurpresa sa pagbisita ni Police Regional Office 7 Director  Ronald Roderos niadtong miaging Sabado sa udto ang Presinto 5 sa Opao, dakbayan sa Mandaue.

Si Sr. Insp. Oscar Monterroyo kinsa bag-o  nga mi-asumer sa katungdanan isip hepe sa kapolisan sa maong presinto  nahingangha sa kalit nga paghidangat ni  Roderos sa ilang presinto sa Opao.

Si Roderos gikan sa iyang pagbisita sa kapolisan sa dakbayan sa Lapulapu ug sa iyang pagpauli balik sa dakbayan  sa Sugbu maoy iyang gihimo ang paghapit sa  Opao Police Station.

Sa nasayran nga mahimo na karon nga pagatawgon og Lapulapu Police Office   ang kapolisan sa Lapulapu ug gitakli ang supervision niini ngadto sa Police Regional Office 7 nga kaniadto ubos kini sa Cebu Provincial Police Office.

Ang National Police  Commission (Napolcom) maoy naghingpit sa kamandoan nga ang kapolisan sa dakbayan sa Lapulapu mahimo na  kining pagatawgon og Lapulapu Police Office.

Nunot sa pagbisita ni  Roderos sa Presinto 5  maoy iyang gihimo ang pagpatangtang sa hugaw nga mga kurtena ug pagpapintal sa bongbong niini.

Kahinumdoman nga nahimong kontrobersiyal ang Presinto 5  human ireklamo ang tulo ka mga polis nga napakyas sa pagtubag sa usa ka alarma nga pagpanunggab nga nahimutang pipila ka metros gikan sa ilang presinto.