Razon ‘ignorante’ sa balaod – Barcenas

Gihulagway ni kanhi IBP-Cebu City Chapter president  Atty. Democrito Barcenas nga ignorante sa balaod si Philippine National Police (PNP) chief Dir. General Avelino Razon Jr., kinsa mipahibalo nga kasuhan  og obstruction of justice ang mga sakop sa media nga ni-cover sa standoff sa Manila Peninsula Hotel nga gihimo sa grupo ni Senador Antonio Trillanes IV.

Si   Barcenas mipadayag nga wala siya makasabot sa gobiyerno ug mismo kang  Razon nga mopasaka’g kasong obstruction of justice sa mga sakop sa media.

Kini tungod kay  walay pruweba nga ang mga media nibabag sa mga  polis ug sundalo dihang nigamit og   pwersa pagsulod sa hotel.

Para kaniya kataw-anan kaayo ang maong hitabo nga pasakaan naman hinuon ang ubang mga sakop sa media nga igo lang nikuha’g impormasyon sa maong insidente.

Sumala pa niini nga inay ang sundalo ug kapulisan maoy magbalantay sa publiko nga maluwas sa bisan unsang mga panghitabo apil na niini ang media apan mao naman  ang napiit sa maong hitabo.

Nagduda siya nga kining maong lakang gipahibalo ni Razon, gumikan kay tataw man kaayo nga ang mga sakop sa media didto sa kauluhan mosang-at og kaso sa kapulisan gumikan sa illegal nga pag-dakop ug pagposas sa mga kamot nila.

Matud pa niini nga kabahin lang kini sa depensa sa PNP aron usab ilang ipalutaw nga justifiable ang ilang pagpanakop niadtong hitabo bisan tuod kun makita sa footages sa mga telebisyon nga nakalapas gyud ang kapulisan sa patakaran.