Gisalig ni Mandaue City Health Officer Dr. Oscar Quirante ang pagsumpo sa mga gikataho nga nagpadayong toro-toro sa mga balay kalingawan.
Si Dr. Quirante nga gikahinabi sa Banat News miingon nga dili ilang trabaho sa buhatan sa panglawas sa dakbayan ang pagpakgang sa maong suliran sa katilingban.
Dugang pa niya ang ilang kaakohan mao lamang ang pagsiguro nga luwas ang mga lumolupyo batok sa mga sakit nga motakboy gikan sa mga babaye nga gikahilawas.
Gitataw ni Dr. Quirante nga ang mga babaye nga nagtrabaho sa mga balay kahilayan sa dakbayan ang kanunay nilang gi-check up sanglit mameligro man ang mga lalaki nga ilang ikahilawas.
Matud pa niya nga ang mga babaye nga nagtrabaho sa mga balay kahilayan ang aduna silay talaan ug kanunay kini nilang gi-monitor ang ilang kahimtang.
Si Quirante miingon nga sa mga gihimo nilang mga pakisusi sa kahimtang sa panglawas sa mga babaye nga nagtrabaho sa mga balay kahilayan wala pa sila makamatikod nga may gitakboyan og sakit nga AIDS.