Lima ka polis nangabukol

Lima ka mga polis sa dakbayan sa Talisay ang nakaangkon og mga gagmay’ng bun-og human ang giingong usa ka lalaking  gikatahong adik nga ilang gisikop ang misukol   nila niadtong Miyerkules sa hapon sa sitio Magay, Tanke sa nahisgutang dakbayan.

Ang suspetado giila sa mga polis nga si Carlos Usok, nagpuyo sa maong lugar kinsa nagtingkagol karon sa Talisay police detention cell.

Ang mga biktima mao sila si SPO4 Ricardo Echavez, PO3 Rey Bucao, PO2 Lino Diez, PO2 Roy Lofranco ug PO2 Mikee Espina.

Si Lofranco mibutyag kagahapon sa buntag sa Banat News nga mipahigayon sila og saturation drive sa lugar batok sa ilegal nga drugas kinsa ilang nakit-an si Usok nga migawas ug naglakaw sa karsada nga naggunit og “totter” ug usa ka silver nga gamay’ng pakete nga gikatahong dunay sulod nga shabu.

Matud ni Lofranco nga ilang giduol si Usok ug nagpaila silang mga polis dayon ila kining gisita tungod sa paggunit niini og drug paraphernalia.

Si Usok gikatahong misuway sa pag-ikyas dihang gisikop na kini sa mga polis.

Si Lofranco mipasangil nga milugnot si Usok dihang ila kining gigunitan ug gipatiran, gitukmod ug gisukmag usab sila sa suspetsado.

Si Lofranco midugang nga sa ilang pag-imbestigar ni Usok miangkon kini nga gikan siya nga nagsuyop og shabu uban ang iyang asawa.

Ang nahisgutang lima ka polis mopasaka og kasong kalapasan sa Section 11 ug 12 sa Akta Republika 9165 kon Comprehensive Dangerous Drug Act Law, direct assault ug resisting arrest.