2 bata namatay sa dengue

Duha ka mga bata ang namatay sa dengue didto sa lungsod sa Malabuyoc, Cebu sulod lang niining semanaha taliwala niining nasinati nga mga pag-ulan- ulan gumikan sa milabay’ng bagyo nga Lando ug Mina.

Gitug-an sa municipal health officer nga si Dra. Runiquisa Saavedra Aloba  nga ang unang biktima mao ang usa ka Frances Jonas Alliosada, 8, tinun-an sa grade-3 ug molupyo sa barangay Poblacion.

Ang biktima nakasinati og    paghilanat ug dihang gidala kini sa usa sa mga pribadong tambalanan dinhi sa dakbayan diha pa nahibaw-i nga dengue ug namatay niadtong Nobiyembre 20.

Ang sunod nga biktima mao ang usa ka  5-anyos nga batang babaye nga molupyo sa barangay Montanesa ug anak sa pamilyang Devibar nga namatay karon lang semanaha.

Gitug-an ni  Aloba nga misaka gyud ang kaso sa dengue sa Ilang lungsod ug gani niini lang bulana miabot na og 12 ka kaso sa dengue ug duha  niini ang namatay.

Gumikan niini, gitakdang irekomendar ni Mayor Daisy Creus sa konseho ang pagdeklarar ubos sa state of calamity sa maong lungsod atol sa sesyon sa konseho karong Huwebes aron magamit ang calamity fund pagpamalit og mga tambal ingon man paglusad og kampanya pagsumpo sa dengue.

Hinuon gitug-an ni  Aloba nga sugod pa niadtong miaging adlaw mipahigayon na og house- to- house campaign ang ilang mga medical team aron pagdasig sa mga molupyo pagpanglimpyo sa palibot ug ipangyabo ang mga magpundo nga  tubig nga maoy itlogan sa lamok nga magdala og dengue.

Gibutyag ni   Aloba nga misaka ang kaso sa dengue sa ilang lungsod gumikan niining mokapin na sa semana nga mga pag-ulan- ulan dala sa milabay’ng bagyo.