Unom ka mga babayeng massage attendant sa usa ka spa sa Sitio Buyong, barangay Maribago, dakbayan sa Lapulapu mireklamo batok sa amo nila nga Koreano tungod sa pagsilot kanila pinaagi sa pagbulad nila ilawom sa init sa adlaw ug wala matagbaw, gipakaon pa gyud sila og baraha.
Human sila gibulad, gitanggong pa gyud sila sa Koreano sulod sa spa nga ilang gitrabahoan hinungdan nga giluwas sila sa mga sakop sa Lapulapu Police Station.
Niadtong miaging adlaw nahitabo ang insidente sa dihang ang unom ka mga massage attendat sa Go Ong Spa naabtan sa ilang amo nga nagdula og baraha samtang naghulat nga may kustomer nga maabot.
Ang mga reklamante nga sila si MichelleFuentes, 26, Antonette Parami, 18, Michell Fernandez, 29, Miriam Bustamante, 21, Joy Malones, 20, ug Edralyn Paglinawan, 18, mitumbok sa ilang amo nga si Joshua Kim, usa ka Korean national, nga maoy mibulad nila sa adlaw ug mipakaon sa baraha.
Si SPO3 Dioscoro Arong, duty officer sa Lapulapu Police Station nagkanayon nga giangkon sa unom ka mga massage attendant nga nagdula sila og baraha, apan gihimo nila kini samtang naghulat og kustomer nga mosulod aron magpamasahe.
Sumala pa nga kalit lang naabot si Kim sa spa hinungdan nga naabtan silang nagdula og baraha.
Nasuko ang Koreano sa iyang nakita nga nagdula og baraha ang iyang mga sakop hinungdan nga gipagawas silang tanan sa spa.
Sa gawas sa spa, gibulad sila sa init sa adlaw sulod sa duha ka oras.
Dili pa paigo, gipapaak sa unom ka mga babaye ang baraha nga ilang giduwaan samtang nagbarog sila ilawom sa init sa adlaw nga atubangan mismo sa daghang mga tawo nga naglantaw kanila.
Ang unom ka mga babaye nagkanayon nga gikaulaw kaayo nila ang gihimo ni Kim ngadto kanila.
Nianang pagkagabii human sa insidente, gitanggong ni Kim ang unom ka mga massage attendant ug gidid-an sa pagpauli.
Apan duha kanila ang naka-eskapo ug mideretso sa Lapulapu Police Station hinungdan nga giluwas kini sa kapolisan.
Nagpaabot ang kapolisan nga mopasaka og kaso ang unom ka babaye batok sa amo nilang Koreano.