2 kaso ni Rosas vs Tsinoy gibasura

Gibasura sa  Cebu City Prosecutors Office ang duha ka kasong kriminal nga gipasaka sa Regional director sa Bureau of Immigration and Deporation (BID-7) batok sa usa ka Filipino Chinese nga negosyante  ug duha ka higala.

Sa duha ka buwag nga  resolusyon si City Prosecutors Nicolas Sellon gibasura niini ang kaso ni BID-7 Regional Director Geronimo Rosas batok kang George Tan nga perjury  ug  intriguing against honor gumikan sa ka kulang  sa probable cause.

Ang piskaliya pinaagi ni  Assistant Prosecutor Victor Laborte mipasabot  sa tulo ka pahinang resolusyon nagkanayon nga si Tan dili mamahimong makasohan sa maong salaod kini tungod kay walay willful and delibirate assertion o mga pagtumo-tumo ngadto sa regional director sa BID-7.

Kun kahinumduman, ang panagbangi ni Rosas ug sa negosyanting si Tan mitumaw human si Tan mipasaka'g kasong administratiba ug kriminal batok kang Rosas, immigration officer Gemma Maximo Torres, duty supervisor Reynaldo Abrea ug  BID-7 personnel Ferdie Balbuena diha sa buhatan sa Ombudsman Visayas.

Kini tungod kay ang iyang duha ka mga Chinese technicians nga sila si Deng Minwei ug Cai Zhouzhi sa iyang negosyong prawn farm gi-isyuhan kini ni Rosas og exclusion order human napakyas   paghatag og  P200 mil  nga kantidad bugti sa kagawasan sa maong duha ka Chinese didto mismo sa buhatan niini sa dakbayan sa Mandaue.

Sa complaint ni Tan mipasabot kini nga ang iyang duha ka mga Chinese technicians adunay igong mga dokumento nga magpamatuod nga legal kining misulod dinhi sa nasud apan bisan pa man niini giisyuhan gihapon og expulsion proceedings human wala sila mohatag og P200 mil.

Sa maong confrontation duha usab ka mga higala ni Tan nga sila si Gabriel Andujar ug Reginald Cabigas   miduso og joint- affidavit batok kang  Rosas ngadto   sa Ombudsman.

Samtang subay niini gibasura usab sa piskaliya ang laing kasong  intriguing against honor batok kang Tan ug sa iyang duha ka mga amigo nga sila si Andujar ug Cabigas

 kini tungod kay ang complaint ni Rosas napakyas usab sa pagpamatuod nga ang mga sinumbong  migamit og mga taktika nga mipasangil nga siya nangurakot.

Gani si Tan sa iyang counter-affidavit mipasabot nga ang gihimo ni Rosas usa lamang ka pagpangharras kaniya ug sa iyang duha ka mga higala ug technicians nga mga  Chinese.