Drive-by-shootings nakaalarma

Giawhag sa Cebu City Police Office ang publiko ug ingon man ang media sa paglikay og sensationalize sa estoryang may kalambigitan sa pagpamusil ilabi na may labot sa nigawas nga sunod-sunod nga “drive-by-shootings” sa dakbayan tungod kay mohimo kini og dili maayong imahe sa dakbayan ug makapalisang sa publiko.

Buot sa kapolisan nga trataron ang balita nga usa ka simpleng insidente lang sa pagpamusil ilabi na nga naestablisar nga sagad sa motibo niini mao ang panagribal sa mga gangs ug fraternity dinhi sa dakbayan.

Kini maoy reaksyon ni Sr. Supt. Patrocinio Comendador kabahin sa insidente sa pagpamusil sa  barangay Tisa niadtong milabay’ng Huwebes sa kaadlawon diin duha ka manag-agaw ang napusilan sa wala mailhing mga tawong luwan sa kolor puti nga multicab nga nagtabon og sanga nga may mga dahon.

Matud pang Comendador nga dako ang ilang pagtuong panimalos ang hinungdan sa pagpamusil tungod kay usa ka gabii una pa ang insidente dunay kagubot tali sa duha ka grupo sa fratman diha sa maong dapit.

“We appeal to the public as a whole and especially the media not to sensationalize stories that would create undue panic to the public,” asoy pang Comendador nga nagpasabot sa “drive-by-shootings.”

Sumala pang Comendador, wala magpasabot nga kung ang usa ka tawo sakay og motorsiklo o ba kaha sakyanan ug mamusil og tawo diha sa dalan mahimo na kining tawgong drive-by-shooting tungod kay sa pagkatinuod ang naulahi sagad himuon sa mga tawong walay lingaw ug buot lang mamusil sa si bisan kinsa nga walay klarong motibo aron kini buhaton.

Samtang sa mga ulahing insidente, sagad ang motibo mao ang panagribal sa mga gang ug fraternity ug ang mga dapit nga gihitaboan estambayanan sa mga miyembro sa maong mga grupo.

Giisip nga makadaut sa imahe sa dakbayan nga bansagan ang mga insidenteng susama niini nga drive-by-shootings tungod kay makapalisang kini sa mga tawo ug sa mga tawong gustong mobisita dinhi.

Atol sa pagpamusil sa barangay Tisa, naangol si Giovanni Navarro,23, human maigo diha sa likod ug bitiis samtang naigo usab sa duha ka bitiis ang iyang 17-anyos nga ig-agaw samtang naglingkod uban sa laing pundok sa mga batan-on diha sa daplin sa dalan.

Nasayran nga ang maong dapit giingong estambayanan sa mga sakop sa gangs ug mga fraternity.

Dugang pang Comendador, ang mga fraternities ug gangs nga mamusil dili moila kung si kinsa ang ilang ig-on basta ang ila lang mao ang makaigo og mga tawong nag-estambay sa maong mga dapit tungod sa pagtuong sakop gyud sila sa karibal nga grupo.

Kini maoy hinungdan nga dunay maigo nga mga walay labot sanglit gawas kay pataka lang ang pagpabuto dili usab sila mga propesyonal nga mogamit og armas dugang pang Comendador.

“These groups are territorials, they want to establish that even if in the other’s territory they could still make them feel unsafe and these gunmen are not professional shooters dili mo-matter sa ila kung kinsay maigo,” asoy pa sa opisyal.

Nunot niini si Comendador buot mopatuman og mas higpit nga pagbantay sa maong mga lugar nga ilado nang estambayanan sa mga gangs ug fraternities ug kung dunay tawong ilang makit-an ilang imbitahon sa presinto ug pakuhaan sa ilang kumpletong pangalan ug hulagway.

Ug kung masutang wala sila’y bug-at nga rason sa pag-estambay sa maong mga dapit pasakaan nila kini og kasong bagransya.

Samtang iapil na sa Mobile Patrol Group og patrolya ang mga tulunghaan sa dakbayan aron mapabati sa publiko nga giseryoso sa kapolisan ang maong problema nga masulbad.

Sumala pang Comendador usa sa mga posibleng hinungdan sa pagdaghan sa mga gangs ug fraternities kini tungod sa kakulang sa mga tunghaan ug komunidad pagtukod og mga organisasyong makapahaylo sa kabataan sa pag-apil.