Faelnar wala mabalaka sa bahad ni Marquez

Wala mabalaka si ABC President Eugenio “Jingjing” Faelnar sa tinguha karon ni Cebu City Urban Poor Consultant Gerry Marguez nga mopasaka og kasong libel batok kaniya gumikan sa pasangil ngadto sa consultant nga nagdawatan og protection money sa mga vendors diha sa aseras.

Si Faelnar nagkanayon nga para kaniya iyang gihangop ang lakang ni Marguez, gumikan kay katungod niini ang pagpadayag sa kaugalingon kun nakita niini nga aduna siya’y kasaypanan.

Gibarugan ni Faelnar nga sa maong isyu wala siya mosulti nga si  Marguez nagdawatan kini og protection money sa mga vendors kun dili ang iyang gipadayag mao lang nga basin kun adunay kuwarta diha hinungdan nga walay demolisyon.

Sumala pa niini nga wala siya magtumbok kang Marguez nga nakadawat og kuwarta kini tungod kay  wala usab siya makakita personal nga adunay kuwarta nga gihatag ang vendors.

Matud pa niini nga isip opisyal sa gobiyerno ug Marguez nagtrabaho usab sa gobiyerno aduna silay katungod sa pag-komentaryo sa mga makita nga dili maayo.

Hinuon iyang giklaro nga para kaniya ang iyaha lang unta mao nga malimpiyuhan gyud ang mga sidewalk dinhi sa dakbayan ingon man sa barangay Guadalupe, diin wala gyud mahimo ni Marguez.

Nunot niini andam siyang moatubang sa kasong ipasaka ni Marguez, gumikan kay wala gyud siya’y malisya sa iyang gipanulti ug nagtumbok ni bisan kinsa.