Public hearing para pletihan giandam

Nangandam na karon ang Land Transportation Franchising and Regulatory Board (LTFRB-7) aron magpatawag og usa ka public hearing kalabot sa petisyon sa mga tag-iyag sakyanan ug mga drayber alang sa umento sa plitehan.

Si OIC Regional Director Rey Elnar sa LTFRB-7 nagkanayon nga iyang gipaabot nga makatunol og position paper ang publiko nga naglakip sa mga trabahante, negosyante ug estudyante  kalabot niini una himoa ang public hearing.

Mao kini gitubag ni Elnar sa nanagtapok nga mga drayber sa iyang buhatan niadtong Huwebes kay gisiging-siging siya nga paabrobahan na ang ilang petisyon.

Segun sa petisyon nga gisang-at sa mga drayber sa buhatan ni Elnar niadtong miaging Lunes, nga  nangayo kinig P7.50 sa unang upat ka kilometro ug tag Pl sa matag kilometrong mosunod.

Ang maong petisyon gihiusahan sa pagpirma sa mga pangulo sa nagkalainlaing organisasyon sa mga sakyanang pasaheroan dinhi sa Sugbu.

Ang mipirma sa maong petisyon mao sila si Engr. Clifford Jude Ninal, sa Cebu Integrated Transport Services Multi-Purpose Cooperative (CITRASCO), Paguito Pacion sa Visayan United Drivers Transport Cooperative (VUDTRASCO).

Eugenio Rodriguez sa Carmen Drivers Conductors Transport Multi-purpose Cooperative (CADCO), Archie Montesuso sa Danao PUJ Operators Drivers MCP (DPOD),  ug Juanito Mantuhac sa Liloan Operators and Drivers Transport Multi-Purpose Cooperative (LODTRAMSCO).

Matud pa ni Elnar nga ang resulta sa maong public hearing maoy iyang ipadala ngadto sa LTFRB Manila diin didto manukad ang katibuk-ang desisyon sa gipangayo nga umento sa pletihan.

Midugang si  Elnar nga uban usab nga motambong sa maong public hearing mao ang mga tinugyanan sa Commission on Audit (COA) ug sa taga Office of the Solicitor General (OSG).

Miingon si Elnar nga unya na siya motakda og petsa sa hearing sa higayong makadawat siya sa position paper gikan sa mga mamumuo, negosyante ug estudyante.

Midugang si Elnar nga ang petisyon sa mga drayber ug position paper sa publiko kalabot sa maong petisyon maoy mga dokumento nga iyang ipadala ngadto sa ilang centrong buhatan sa Manila aron basehan sa lakang sa ilang labaw’ng buhatan.