Environmental subjects sa tunghaan suportahan

Gihangop ni Cebu City Councilor Nestor Archival ang balaudnon nga gipalabang ni Senadora Pia Cayetano, ang Senate Bill 1699 kon ang Environmental Awareness and Education Act.

Ang nahisgutang balaudnon mag-integrate sa tanang environmental subjects diha sa tanang pribado ug publikong mga tunghaan.

Tumong niini nga motaas ang “level of awareness” sa kabataan ug kabatan-unan sa kabililhon pagpanalipod sa kalikupan ug kinaiyahan.

Matud ni Archival nga dako og ikatabang ang proposal ni Cayetano batok sa nagpabiling hulga sa environmental degradation.

Ang konsehal nga mao ang chairman sa Committee on Ecology and Environmental Management sa City Council niingon nga mas bintaha kun bata pa lang matudluan na kung unsaon pagprotihir ang kalikupan ug ang paghatag niini og bili sa natural resources conservation.

“I fully support that kay kahibawo ka importante man gyud ang kabataan kay sila man     ang atong ugma, so, kinahanglan sila makahibawo daan kay kita sa una late na kaayo kahibawo so nigawas nga ang atong initiative dili kaayo epektibo kay ang mga tawo dili man kaayo mo-support, kung mag-start sa school, ila gyud nang madala pagkadako nila,” sumala ni Archival.

Ang environmental subjects isukip sa tanang learning programs gikan sa elementarya, high school, kolihiyo ug bisan gani sa non-formal ug out-of-school programs.

Matud ni konsehal Archival nga siya mupalabang og resulusyon sa konseho nga mag-awhag sa kongreso pag-aprubar sa nahisgutang balaudnon.

Niingon ang konsehal nga angayan lang makat-unan sa mga tinun-an ang husto nga environmental values tungod kay kini ila ra gihapong magamit sa umaabot.

Nasayran nga ang Environmental Awareness and Education Act naaprubahan na sa una ug ikaduhang pagbasa sa senado.

Kini gikataho nga giindosar usab sa nagkadaiyang mga komitiba sa senado sama sa Arts       and Culture, Environment and Natural Resources, Education, Finance ug uban pa.