2 ray natalang may AIDS karon

Duha lang ka kaso sa Human Immuno Virus-Acquired Immune Deficiency Syndrome kon HIV-AIDS ang natala sa Cebu City Health Department sud niining tuiga.

Kini maoy gibutyag ni Doctor Ilya Tac-an, ang coordinator sa STD-HIV-AIDS diha sa City Health Department.

Matud ni Doctor Tac-an nga mas gamay ang nahisgotang gidaghanon itandi sa niaging tuig nga giingong dunay upat ka kaso.

Sa pikas bahin, ang Aids Free Philippines kon AFP nitala na og walo ka kaso sa HIV-AIDS dinhi sa Sugbu niining tuiga.

Sumala sa director sa AFP nga si Doctor Rene Josef Bullecer nga posibling daghan pa niini ang wala mataho nga mga kaso. 

Ang pamahayag ni Bullecer gidasunan usab ni Doctor Tac-an tungod kay giingong walay balaud sa nasud alang sa mandatory testing.

Niingon si Doctor Tac-an nga ang ilang gihimo mao lang ang pagpadayon sa ilang advocacy alang sa voluntary counseling ug testing.

Taliwa niini nagpasalamat gihapon si Doctor Bullecer ug Doctor Tac-an sa kagamay sa mga kaso sa HIV-AIDS dinhi sa Sugbu.

Ang City Health Department nakatala na og 70 ka kaso sukad niadtong 1989 samtang ang AFP nakatala og 115 ka kaso apan sukad lang niadtong 1996.

Nasayran gikan sa Department of Health kon DOH nga ang nasud duna lay 3,119 ka kaso sa HIV-AIDS sukad niadtong 1985.

Kini giingon ni Bullecer nga mas gamay gihapon itandi sa ubang kanasuran sa Asya ilabina sa nasud sa India nga mao karoy nag-una nga gisundan sa Thailand ug China.

Matud ni Bullecer nga ang India duna nay 1.1 milyunes ka kaso sa HIV-AIDS, 886 sa Thailand ug 418 usab ka kaso sa China.

Niingon si Bullecer nga ang Pilipinas maoy ikaduha sa pinakaubos og kaso sa nahisgutang sakit dinhi sa Asya.

Sa pikas bahin gipahibawo ni Doctor Tac-an nga karong Sabado, Desyembre 1, ang    Sugbu moduyog na usab sa matag tuig nga pag-obserbar sa World Aids Day.