3 ka batang magsuon patay sa kalibang

Tulo ka mga bata nga sakop sa pamilyang Buhayan didto sa bukirang barangay sa Sityo Dam, barangay Buhisan ning dakbayan sa Sugbu ang namatay sa sakit nga pagsuka- kalibang sulod lang ning semanaha.

Nasayran sa Banat News gikan sa nurse nga nadestino sa barangay Buhisan nga si Asuncion Guaren nga ang unang namatay mao si John Michael Buhayan, 3, namatay niadtong Huwebes sa milabay’ng semana, gisundan kini sa iyang magulang nga si Janice, 7, namatay niadtong Lunes ug dayon misunod ang magulang niini nga si Cielo, 9, namatay niadtong miaging kaadlawon.

Sa pagpakighinabi sa Banat News ngadto kang Dorenda Macasocol, ang Assistant city epedemiologist nga gipaabot pa nila ang resulta sa laboratory examination pagsuta kun diarrhea ba gyud ang gikamatyan nga sakit sa maong mga magsuon nga bata.

Hinuon gikonpirmar ni Macasocol nga misaka karon ang kaso sa diarrhea dinhi sa dakbayan nunot niining nagpadayon nga mga pag-ulan-ulan.

Subay sa rekord sa CESU, nasuta nga gikan niadtong milabay’ng bulan sa Enero ning tuiga hangtod sa  Nobiyembre10  miabot na og 2,686 ang mga kaso sa diarrhea ug 35 na ang namatay wala pay labot niini ang tulo ka bata nga sakop sa pamilyang Buhayan didto sa Buhisan.