Menos ang nanulod nga turista

Medyo miminos karon ang mga langyaw nga miabot dinhi sa Sugbu kung itandi sa milabay'ng katuigan gumikan sa mga tahong pagpamomba didto sa kaulohan ug sunodsunod nga bagyo dinhi sa nasud.

Kini ang giluwatang pamahayag ni BID 7 Regional Director Geronimo Rosas atol sa pakighinabi sa Banat News.

Matud pa ni Rosas nga base sa ilang obserbasyon sa tugpahanan sa MCIA ug didto sa NAIA minos ang mga langyaw nga nangabot karong bulana kung itandi sa milabay'ng tuig ilabi na nga nagsingabot ang kapaskohan.

Base sa impormasyon sa BID nga kini gumikan sa sunodsunod nga pagpamomba nga nahitabo didto sa kaulohan ilabina sa Glorieta, Cavite ug sa Batasan Complex sa milabay'ng semana diin posibleng ang mga nasud mipahimangno sa ilang mga residente nga dili pa maayo nga mopadangat sa Pilipinas hinungdan nga ang uban nanagana kini sa pagbisita sa nasud.

 Usa usab sa mga posibleng hinungdan niini mao ang pag-igo sa nasud sa sunodsunod nga bagyo diin miani kini og daghang danyos ilabina ang mga dapit nga suroyanan sa mga langyaw sama sa Palawan ug Boracay nga naigo sa bagyong Lando ug nagbilin kini og dagkong kadaot sa mga tourist spots sa nasud.

Gumikan niini nanghinaut si  Rosas nga hatagan kini og dakong pagtagad sa mga lokal nga kagamhanan sa mga dapit nga naapektuhan sa bagyo aron madali ang paghibalik sa mga maanindot nga talan-awon ug kahilayan sa nasud.

 Samtang sa kasong pagpamomba didto sa kaulohan nanghinaut si Rosas nga masulbad og dali ang mga panghitabo gumikan kay usa kini sa gilantaw sa mga dumoduong ang kahapsay ug kalinaw sa atong dapit sa dili pa modesider ang usa ka  langyaw nga magbakasyon dinhi sa nasud ilabi na sa Kabisay-an.