Bodyguard ni Gwen nakapusil og isnatser

Napusilan sa babayeng polis ang usa ka isnatser nga sakop sa AKrho human kini manglabni og bag sa usa ka babaye dihang misuway og ilog sa armas sa miaging gabii pasado alas 9 diha sa Yati Liloan.

Ang napusilan nga isnatser ug nalandig sa Vicente Sotto Memorial Medical Center kinsa nakaangkon og samad pinusilan sa tuong bahin sa lawas ubos og diyutay sa tiyan giila nga si Michael Pradia, 20, nga taga Greenhills, Poblacion, Liloan.

Samtang ang nakapusil giilang si PO2 Vilma Degamo, residente sa Yati sa samang lungsod ug sakop sa Cebu Provincial Police Office (CPPO) ug gidestino diha sa Provincial Capitol isip police escort ni Cebu Governor Gwendolyn Garcia.

Matud pang PO3 Ricardo Enriquez sa Liloan Police Station nga igo lang mitubag si PO2 Degamo human makadungog og siyagit sa usa ka babaye nga nangayo og pakitabang hinungdan iyang gigukod ang suspek.

Gikatahong misuway og ilog si Pradia sa armas sa maong polis nga misangko sa pag-inilogay kanila hangtod nga nibuto kini ug didto hinuon maigo sa iyang lawas.

Base sa blotter nga gibutyag ni PO3 Enriquez nga usa ka Rosemarie Bidolido Abadilla, 17, mitug-an nga kasamtangan siyang nagbarog-barog sa may waiting shed sa nahisgotang lugar aron mag-atang og kasakyan apan kalit lang niduol kaniya ang suspek diretso'g labnot sa iyang bag.

Tuod man nilampos ang gikatahapan sa pagdala sa bag sa biktima nga dunay sulod nga mga importanteng papeles ug kuwarta nga nagbalor P1,000.

Nisyagit si Abadilla ug nangayog tabang ngadto sa mga istambay apan pag-abot sa unahan kalit lang nadakin-as ang suspek ug dali kining nakaitsa sa bag dayong barug ug nisutoy na usab og dagan.

Dugang asoy sa biktimang si Abadilla ngadto sa kapolisan pagkataud-taod nakadungog siya duha ka sunod-sunod nga buto sa armas ug tungod sa iyang kahadlok nisakay siya og PUJ paingon sa Liloan Police Station aron itaho ang nahitabo kaniya.

Si Pradia gihulagway sa kapolisan nga anaa sa delikadong kahimtang sulod sa VSMMC ug padayon pa kining giobserbahan sa mga doktor nga miatiman kaniya samtang nagpaabot sa tukmang sumbong batok kaniya.