Nursing student nag-workout gipatay

Usa ka lalaki nga tinun-an sa kolehiyo  patay ug laing usa  naluwas human sila gipamusil sa duha ka lalaking manag-agaw samtang diha ang mga biktima sulod sa fitness gym.

Ang insidente sa pagpamusil nahitabo pasado ala 1 sa milabay’ng hapon diha sa sitio Manol barangay Tisa, dakbayan sa Sugbu.

Ang namatay nga nagpadako og sugod sa iyang lawas giila nga si Micky Enricoso, 19 anyos ug usa ka first year college sa kursong nursing sa  University of San Jose-Recoletos samtang ang nakadagan nga kauban mao si Rener Villacorta, 23 anyos ug iyang silingan diha sa Tisa.

Ang gitumbok nga namusil ang manag-agaw nga Laime ug Arnel Parba, residente sa nahisgutang dapit.

Sa pasiunang imbestigasyon sa Homicide Section sa Cebu City Police Office pinaagi  ni PO2 Geoffrey Gutual nagbutyag nga nagpraktis sulod sa gym ang mga biktima aron magpadako sa ilang lawas apan kalit lang miabot ang mga suspetsado nga may dalang armas ug tubo.

Gikomprontase ni Laime Parba ang mga biktima kabahin sa iyang nadunggan nga tabi-tabi  nga siya ug  ang suspetsado “birahan” sa mga biktima.

Apan kusganon kining gipanghimakak sa mga biktima ang maong alegasyon, apan wala maminaw ang suspetsado dayong hagit og sinukmagay apan  wala lang panumbalinga sa mga biktima apan mikuha kini og armas ug dayon gipamusil ang mga biktima.

Unang gipusil si Enricoso ug gisunod si Villacorta apan nakadagan hinungdan nga wala kini maigo samtang ang mga suspetsado daling misibat palayo sa maong lugar, uban sa iyang ig-agaw nga may dalang  tubo isip back-up.

Si Enricoso naigo sa iyang dughan, bukton ug bukobuko gamit ang kalibre .38 nga rebolber nga maoy nakaingon sa hinanali niining kamatayon.

Hangtod karon wala pa madakpi sa kapolisan ang manag-agaw’ng Parba samtang nagpadayon usab ang gihimong imbestigasyon sa kapolisan aron masayran kung unsay motibo sa pagpamusil.