Presyo monitoron

I-reactivate na usab sa kagamhanan sa dakbayan sa Sugbu ang Cebu City Local Price Monitoring Council (LPMC) sumala pa ni City Administrator Bimbo Fernandez ang chairman sa LPMC sa siyudad, subay usab sa nagkaduol na nga Christmas season.

Buot ni Fernandez nga ma-monitor ang presyo sa nanag-unang palaliton aron pagpugong sa mga negosyante pagpahimulos sa sitwasyon.

Kini ilabina nga walay hunong ang pagsaka sa presyo sa mga produktong petrolyo sama sa gasolina, krudo ug uban pa.

Matud ni Fernandez nga siya mupatawag og tigom karong Biyernes alang sa tanang naglangkob sa LPMC.

Partikular na niini ang mga representante gikan sa Department of Trade and Industry, Department of Agriculture, National Food Authority ug uban pa.

Kini aron ilang hisgutan ang subli na usab nga pagsuroy ngadto sa kamerkaduhan ug sa mga dagkong tindahan sa dakbayan.

“Ato gyong monitoron ang presyo sa mga baligya diha sa atong kamerkaduhan aron mahimoan nato og lakang kung dunay kalit nga kausaban,”suma ni Fernandez

Base sa obserbasyon ni Fernandez nga musaka gyud ang pipila ka palaliton samtang nagkaduol na ang panahon sa pasko.

Kini ilabina sa mga karneng baboy, baka, manok nga giingon ni Fernandez nga maoy labing himalitan sa Christmas season.