Pasahero nanglangoy tungod ni Lando

Duha ka pump boat nga nagpaingon sa barangay Sta. Rosa sa isla sa Olango, dakbayan sa Lapulapu ang nalunod alas 4 pasado ang takna sa hapon atol usab sa kalit nga pagkusokuso sa bagyong Lando dinhi sa Sugbu sa miaging Lunes sa hapon.

Matud pa ni Julius Pagas, radio operator sa kapolisan nga ang nalunod mao ang Mornel Paul nga gipanag-iya ni Paul Ompad nga giluwanan sa tulo ka tawo nga naglakip kanila ni Dino Ompad, Joseph Ompad ug usa ka Boy Balonon nga pulos hingkod ang panuigon ug nagpuyo sa maong dapit.

Si Pagas miingon nga gikan sa mainland sa dakbayan sa Lapulapu ug mopaingon kini sa Isla sa Olango dihang hapit na unta silang modunggo kalit kining gisugat sa dakong balod nga maoy nakaingon sa pagkalunod.

Dugang pa niya nga nanglangoy na lamang ang tulo ka mga biktima paingon sa daplin ug hingpit gayod sila nga nakalingkawas sa maong trahedya sa kadagatan.

Ang laing nalunod nga King of the Sea nga pump boat ang giluwanan usab sa duha ka mga tawo nga nagpaingon unta sa pagtago sa luyo sa isla sa Olango apan kalit kining nalunod ug nakalingkawas ang mga nagluwan nga sila si Raymundo Cailan ug laing kauban niini.

Natumba usab ang tower sa base control sa city hall ug pipila ka mga payag-payag sa Mactan Shrine sa barangay Mactan ang nangaguba sa kusog nga paghuros sa hangin sa pag-igo sa bagyo.