Pito mipuga atol sa bagyo

Pito ka mga minor de edad nga gitawag og Children In Conflict with the Law kon CICL diha sa Operation Second Chance diha sa barangay Kalunasan ang mieskapo niadtong milabay’ng hapon atol sa sa pagkuso-kuso sa bagyong Lando.

Kini maoy gikompirmar sa Co-chairperson sa Operation Second Chance nga si Margot Osmeña.

Giklaro hinoon sa unang ginang sa dakbayan nga ang duha niini nasikop pagbalik ug ang lima na lang ka CICL maoy padayon karong gipangita, apan dili ikabutyag ang mga pangalan gumikan sa ilang mga edad.

Subay niini gikasubo ni Osmeña ang maong hitabo tungod kay sa Banat News pa nakahibawo sa nahisgutang pagpuga sa mga batang menor de edad.

Tungod niini, paesplikahon ni Osmeña ang mga guwardiya sa Operation Second Chance ilabina ang jailwarden niini nga si Senior Inspector Jennifer Joyce Abar.

“They should explain how it happened and I want to know what happened to the children why they escaped,” matud pa ni Margot.

Nasayran usab sa Banat News  nga ang jailwarden wala pa makasumitir og report sa maong insidente ngadto sa BJMP-7 hangtud kagahapon sa alas 3 sa hapon.

“I’m upset because it’s only through you that I was able to find out, na-confirm nako sa social worker nga dunay nieskapo,” sumala pa ni Margot.

Nagdumili hinoon pagbutyag si Osmeña sa iyang plano sa nahisgutang mga gwardiya hangtud nga di pa niya madungog usab ang habig niini.

Nagduda ang unang ginang nga gitunong sa paghuros sa bagyong Lando ang pag-eskapo sa maong mga batang sad-an sa balaod.

Nasayran hinoon sa Banat News nga gipangita na sa mga guwardiya sa Operation Second Chance ang nipuga nga mga minor de edad.

Gipadayag sa unang ginang nga ang pag-eskapo sa mga CICL maoy labing unang higayon diha sa Operation Second Chance.

Ang Operation Second Chance maoy labing unang pasilidad sa nasud nga maoy butangan sa mga batang makasala sa balaod aron pagprotihir sa ilang katungod isip mga bata bisan paman sa ilang nahimong kasaypanan.