Nangandam ug nag-monitor 24 oras ang Cebu City Disaster Coordinating Council kon CCDCC ug ang Cebu City Police Office sa kinatibuk-ang dakbayan subay usab sa walay hunong nga pag-uwan-uwan nga nasinati sa siyudad sukad pa sa niaging adlaw hangtud karong adlawa.
Matud pa sa labaw sa CCDCC nga si Engineer Rolando Ardoza, wala pa silay nadawat nga taho sama sa nahitabong landslide ug naanod ba hinoon sa baha.
Apan gipahinumduman na ni Ardoza ang mga molupyo sa mga bukirang barangay ug sa daplin sa kasapaan nga magmonitor sa ilang palibot ug mas maayong mohiklin na ang mga molupyo ngadto sa mas luwas nga dapit aron malikayan ang bisan unsang trahedya.
Nasayran gikan kang Ardoza nga misugod na pagsaka ang tubig sa pipila ka sapa sa siyudad mugna sa walay hunong nga pag-uwan.
Gipahimangnoan na usab ni Ardoza ang mga opisyal sa mga bukirang barangay nga mag-monitor sa kahimtang sa ilang dapit ug sa ilang mga konstituwente.
Partikular nga gi-monitor sa CCDCC mao ang giila nang landslide-prone areas sa siyudad sama sa barangay Busay, Kalunasan, Sirao, Binaliw ug uban pa.
Nasayran usab sa buhatan sa chairman sa CCDCC nga si Konsehal Gerardo Carillo duna nay gipahimutang nga mga heavy equipment sa mga bukirang barangay nga gamiton sa higayon nga dunay modahili nga mga yuta sa karsada ilabina sa Cebu Transcentral Highway.
Gawas niini, nakig-alayon na usab ang buhatan ni Carillo ngadto sa Cebu Contractors Association (CCA).
Kini alang sa paghuwam unya sa siyudad og mga heavy equipment, nga magamit sa dinaliang panginahanglan sa higayon nga dunay mahitabong landslide.
Samtang gialerto na sa Cebu City Police Office ang bag-uhay lang na-organisar nga CCPO Medical Response Team nga gitagana alang sa mga katalagman sama sa mga pagbaha nga magkinahanglan og dinaliang tabang.
Kini gumikan kay sagad sa mahitabo, polis maoy mag-unang makaresponde apan kaniadto ang mga polis wala masayod kung unsay buhaton ug ang uban kanila dili gani makahatag og eksaktong sitwasyon sa dapit nga nahitaboan aron makatabang sa mga umaabot nga mga rescuers kung unsay angayan nilang madala sa dapit.
Matud pa ang maong team gilangkuban sa mga polis nga mitapos og mga kursong may background sa medisina ug ilawom sa pagdumala sa Operations Section sa CCPO.