Ilusad na karong umaabot Huwebes, Nobiyembre 23 ang tulo ka adlaw nga “Pasigarbo sa dakbayan sa Sugbu diha sa SM Trade Hall.”
Ang Pasigarbo sa dakbayan sa Sugbu maoy programa nga gitumong sa mga tinun-an sa nagkadaiyang kolehiyo ug unibersidad sa siyudad pagtukod og kaugalingong negosyo.
Matud sa chairman sa Committee on Labor and Employment sa dakbayan, Konsehal Edu Rama, walo ka mga dagkong tunghaan sa dakbayan ang misanong sa maong programa.
Ang mga tinun-an sa maong mga tunghaan giingong nangita og lainlaing mga raw materials sa probinsya ug maoy ilang gigahinan og pohunan.
Sumala pa ni konsehal Rama nga mga pagkaon ug mga handicraft ang lakip sa mga produkto nga makita ug mapalit atol sa launching sa Pasigarbo sa dakbayan sa Sugbu.
“So kung may oras mo nga makabisita sa SM Trade Hall, adto mo didto aron inyong makita ang nagkalain-laing mga produkto nga hinimo sa mga estudyante,” matud sa konsehal.
Ang Pasigarbo sa Sugbu maoy usa ka proyekto sa kagamhanan sa dakbayan uban usab sa pagpakig-alayon sa DTI pinaagi sa Small and Medium Enterprise Development Council.
Miingon si Rama nga dako unya og matabang ang maong programa ngadto sa mga estudyante alang sa pagdasig kanila sa pagnegosyo human sa ilang pagtungha.
Kini ilabi na kun ang mga estudyante nga mogradwar sa kolehiyo maglisod pagpangita og trabaho sibo sa ilang gi-eskwelahan.
“Ato man gong nakita nga mas maayo nga sila makakat-on na unsaon pag-negosyo samtang nagtungha pa,” ni Rama.