Koreano gipusil sa tulisan

Usa ka Koreyano ang nalandig sa tambalan human pusila sa usa sa duha ka tulisan nga nagmotor dihang kini misukol diha sa may Gonzalez Compound sa barangay Camputhaw niadtong Sabado sa gabii.

Giila sa Theft and Robbery Section ang biktima mao si No Hyung Tae, 26, tinun-an sa usa ka language school diha sa Trinity Plaza Tower ug lumad nga taga Busan, South Korea.

Duha ka wala mailhing lalaking sakay og kolor pulang Honda XRM ang gitumbok nga mipusil sa biktima dihang misuway kini og harong sa usa kanila nga buot mokuha sa iyang cellphone.

Sumala pa nga ang biktima kasamtangang naglakaw diha sa maong dapit dihang gibabagan sa mga tulisan ug ang backrider mikanaog dayon miduol kang No ug giilog ang iyang cellphone nga Motorola.

Ang biktima wala dayon mohatag ug misuway pagharong sa tulisan apan diha-diha mibunot og armas ang maong tawo ug gipusil makausa ka higayon ang walang bitiis niini ug gilapsan pa ang pikas paa niini.

Human matumba gikuha sa tulisan ang cellphone sa biktima ug daling misakay sa motor ug miikyas padulong sa dalan Escario.

Pipila palang ka bulan ang nakalabay, usa gihapon ka babayeng Korean nga tinun-an gihapon sa usa ka language school diha sa barangay Banilad ang gitulis ug dihang mikisi-kisi gipusil kini.

Ang maong langyaw nakalingkawas sa kamatayon samtang nasikop usab ang duha ka mga tulisan pipila ka adlaw human sa hitabo apan wala na marekober ang mahalong mga butang sa Koreana.