Kapitolyo alerto batok bombers

Usa ka resolusyon ang giumol sa  hunta probinsiyal nga  nagkondenar sa nahitabong pagpamomba sa parkinganan sa Batasang  Pambansa complex niadtong Martes sa gabii.

Ang maong resolusyon nga gipangamahan ni  Bokal Wenceslao  Gakit nagtumbok sa kahuyang sa monitoring sa mga guwardiya nga  gipabantay sa kongreso.

Lakip nga gisentro sa maong resolusyon mao ang kahinay sa  pagkuhag impormasyon sa  intelligence unit sa security group nga gitahasan  pagbantay sa maong lugar.

Si Gakit kinsa, tsirman sa committee on peace and order sa  hunta provincial nagkanayon nga walay laing mabasol sa maong hitabo nga  namatyan og upat ka tawo gawas sa mga guwardiya.

Miingon siya nga kun wala pa magdanghag ang mga security guard dili  mahitabong makasulod kadtong maong bomba  nga giingong didto ra  ibutang sa usa ka motorsiklo haduol sa sakyanan ni Kongresista Wahab  Akbar, ang unang namatay sa maong hitabo.

Ang maong resolusyon magpasabot nga walay nakadayeg sa  kahaguka sa seguridad  sa palibot sa Batasan building niadtong higayona,  matud pa ni Gakit.

Busa alang kaniya ning mga panahona angayan nang mahigmata  kadtong mga gitahasan sa pagbantay sa nagkalainlaing establisemento  mahimong pribado ug iya sa gobiyerno aron dili na magkompiyansa pa.

Midugang si Gakit  nga diha sa pagkompiyansa daghang maangin nga  kinabuhi ug anugon kaayo ilabi na kun ang mabiktima may dako pag  ikatampo sa mga gimbuhaton sa gobiyerno alang sa pagpalambo sa nasud sa  natad sa panginabuhi ug sa politika.

Gitakda ang maong resolusyon nga tukion karong umaabot nga  Lunes atol sa regular nga sesyon sa hunta probinsyal.

Samtang si Capitol Security Consultant Byron Garcia mikuha na og serbisyo sa duha ka K9 Dogs aron magamit sa seguridad sa Kapitolyo.