Napusilan sa polis

Naangol ang usa ka batan-ong lalaki human mabiktima sa pagpamusil sa usa ka sakop sa kapolisan sa miaging gabii sa Pagsabungan, dakbayan sa Mandaue.

Ang biktima mao si Araquiles  Carcedo, ulitawo nga taga Jugan, Consolacion ug ang nakapusil mao si SPO1 Rey Jaron sa Cebu Provincial Police Office.

Si PO1 Melvin Pelayo nga gikahinabi sa kapolisan Presinto 3 sa Basak Police Station nga gikahinabi sa Banat News miingon nga may karaang panagbangi si  SPO1 Jaron ngadto sa biktima.

Dugang pa niya nga si SPO1 Jaron nga nag-inom sa tindahan uban sa usa ka higala ang naabtan sa biktima kinsa mopalit unta og sigarilyo hangtod nga nagkalalis.

Si PO1 Pelayo miingon nga midagan sa sulod sa panimalay ang higala nga gikainom ni  SPO1 Jaron ug sa pagbalik nagdala na kini og armas.

Dali nga gihatag ang armas kang SPO1 Jaron  ug gipusil ang biktima sa makaduha ka higayon ug pagkahuman misibat kini pahilayo sa maong dapit.

Ang  biktima kinsa nakabaton og samad pinusilan sa bukton ang unang gidala sa Everly Child Sanitarium sa Jagobiao sa maong dakbayan.

Human sa pasiunang pagtambal dali kining gibalhin sa Vicente Sotto Memorial Medical Center sa dakbayan sa Sugbu.